Xüsusi mühafizə olunan təbiət ərazilərində mübarizə tədbirləri davam edir
Bakı, 30 iyul (AZƏRTAC). Hazırda ölkəmizdə ümumi sahəsi 880 min 975,6 hektar olan xüsusi mühafizə olunan təbiət əraziləri, o cümlədən 8 milli park, 11 dövlət qoruğu və 24 yasaqlıq fəaliyyət göstərir. Bu ərazilərin genişləndirilməsi və bioloji müxtəlifliyin qorunması istiqamətində işlər davam etdirilir.
Ekologiya və Təbii Sərvətlər Nazirliyinin mətbuat xidmətindən AZƏRTAC-a verilən məlumata görə, 2011-ci ilin birinci yarısında qanun pozucularına qarşı 352 akt, 139 protokol tərtib edilmiş, 76 min 690 manat cərimə tətbiq olunmuş, 23 iş hüquq mühafizə orqanlarına, 58 iş məhkəmə icraçılarına göndərilmişdir. Eyni zamanda, brakonyerlərdən 66 ov silahı götürülmüş və onlar 50 min 600 manat cərimə ödəmişlər.
Su hövzələrində bioloji resursların qorunması məqsədi ilə balıq ovlayan şirkətlərlə müqavilələr bağlanmış, yem bazasının yaradılması biotexniki normativlərə uyğunlaşdırılmışdır. Bundan başqa, qanun pozucularından 4 qayıq, 52 tor, 435 müxtəlif növ balıq götürülmüş, bioloji resurslara vurulmuş ziyanla bağlı 29 min 696 manat məbləğində iddia qaldırılmışdır.
Bu ilin sonuna qədər isə 434,2 milyon müxtəlif növ balıq körpəsinin Kür çayına və su anbarlarına buraxılması nəzərdə tutulmuşdur.
Bölmənin digər xəbərləri
