Xüsusi qayğıya ehtiyacı olan şəxslər stasionar və yarımstasionar xidmətlərdən yararlanırlar
Bakı, 28 noyabr, Aytac Haqverdiyeva, AZƏRTAC
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin müəssisələri və Sosial Xidmət Mərkəzləri vasitəsilə həssas əhali qruplarından olan şəxslərə sosial reabilitasiya xidmətləri göstərilir.
Bu barədə AZƏRTAC-ın sorğusuna cavab olaraq Sosial Xidmətlər Agentliyinin mətbuat xidmətindən məlumat verilib.
Bildirilib ki, göstərilən xidmətlərə sosial-məişət, sosial-psixoloji, sosial-iqtisadi, sosial-pedaqoji xidmət, eləcə də hüquqi məsləhət yardımı daxildir.
Agentliyin sosial xidmət müəssisələrinə 18 yaşınadək əlilliyi müəyyən edilmiş şəxslər üçün sosial xidmət müəssisələri, psixonevroloji sosial xidmət müəssisələri, Ahıl şəxslər üçün sosial xidmət müəssisəsi, Əlilliyi olan şəxslərin Peşə-əmək Reabilitasiyası Mərkəzi və digərləri aiddir. Həmin müəssisələrdə xüsusi qayğıya ehtiyacı olan şəxslər sosial reabilitasiyaya cəlb edilir, stasionar və yarımstasionar xidmətlərdən yararlanırlar.
Sosial reabilitasiyayönümlü işlərin daha səmərəli təşkili məqsədilə Agentliyin 5 Sosial Xidmət Mərkəzi və 1 Sosial Xidmət Kabineti də fəaliyyətdədir. Mərkəzlərdə benefisiarlara sosial reabilitasiya xidmətləri ilə yanaşı, loqopedik dəstək, aktiv terapiya, korreksiya, psixoterapiya və digər xidmətlər göstərilir.
Bununla yanaşı, müəssisələrdə insanların sosial həyata daha rahat inteqrasiya olunması, özünüifadə bacarıqlarının inkişafı və gündəlik həyatda müstəqilliyinin artırılması üçün müxtəlif dəstək mexanizmləri tətbiq edilir. Görülən işlərin məqsədi hər bir benefisiarın ehtiyacına uyğun şərait yaratmaq, onların sosial rifahının təminatına töhfə verməkdir.
Bölmənin digər xəbərləri
