Yalçın Hacızadə: Gürcüstan Azərbaycanın sayəsində enerji təhlükəsizliyi təmin olunmuş ölkələrdən biridir
Bakı, 30 oktyabr, AZƏRTAC
Prezident İlham Əliyevin Gürcüstana son səfəri iki ölkə arasında münasibətlərin qurulmasının 30 illiyi ərəfəsinə təsadüf etdi. Səfərin tarixi, müzakirə olunan geniş və əhatəli məsələlər onun əhəmiyyətini daha da artırır. Azərbaycan-Gürcüstan münasibətlərinin təməli ulu öndər Heydər Əliyevin hakimiyyətə gəlişindən sonra daha da möhkəmlənib və bu əlaqələr hazırda müttəfiqlik səviyyəsinə qədər yüksəlib. Baş nazir İrakli Qaribaşvilinin mətbuata bəyanatında Azərbaycan, ümummilli lider Heydər Əliyev və Prezident İlham Əliyev haqqında söylədiyi xoş sözləri, fikirləri, səfər zamanı dövlətimizin başçısına göstərilən münasibəti Gürcüstanın ölkəmizlə əlaqələrə verdiyi önəm, diqqət kimi qiymətləndirmək olar.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə bildirib.
Politoloq qeyd edib ki, coğrafi və geosiyasi baxımından bölgə Xəzər dənizi və Qara dəniz arasında körpü rolunu oynayır. Yəni, həm Azərbaycan, həm də Gürcüstan bu mənada vahid körpünü təşkil edir. Bu mövqe Uzaq Şərq və Mərkəzi Asiya ölkələrinə Avropaya qısa yollarla çıxış imkanı verir. Prezident İlham Əliyevin Mərkəzi Asiya ölkələrinə səfərləri, həm ikitərəfli, həm də Türk Dövlətləri Təşkilatı çərçivəsində genişləndirilən əlaqələr, müzakirə olunan məsələlər vacib əhəmiyyətə malikdir. Bundan sonra dövlətimizin başçısının Gürcüstana işgüzar səfəri həmin proseslərin davamı kimi xarakterizə olunmalıdır. Əlbəttə, burada əsas məqsəd Mərkəzi Asiya ölkələrinin karbohidrogen resurslarını və digər yüklərini Gürcüstan vasitəsilə qardaş Türkiyəyə və Avropaya çatdırmaqdır.
Y.Hacızadə bildirib ki, Azərbaycan və Gürcüstanın tarixi İpək yolunun üzərində yerləşməsi və ölkələr arasında uğurlu regional əməkdaşlıq, nəqliyyat layihələrinin icrası regiondan keçən yüklərin həcmini dəfələrlə artırıb. Həmçinin Bakı-Tbilisi-Ceyhan, Bakı-Tbilisi-Ərzurum neft və qaz kəmərlərinin, Bakı-Tbilisi-Qars dəmir yolunun reallaşması regionda sülh və sabitliyin, Avropada isə enerji təhlükəsizliyinin təmin olunmasında böyük rola malikdir. Gürcüstanın sabiq prezidentləri Eduard Şevardnadzenin “Azərbaycanın təşəbbüsü ilə bu layihələr reallaşmasaydı region unudulmuş və müharibələrin hökm sürdüyü yer olardı” və ya Mixeil Saakaşvilinin “Gürcüstanın dostları çoxdur, lakin ən çətin günündə Azərbaycan onun yanında oldu” fikirləri ölkəmizin bölgədəki roluna, həyata keçirdiyi meqalayihələrə və iki dövlət arasında münasibətlərin inkişafına göstərdiyi diqqətə verilən dəyərdir.
Avropa İttifaqı ölkələrinin enerji təhlükəsizliyinin təmin edilməsində Azərbaycana marağın artması və bu sahədə ölkəmizlə əlaqələrin daha da genişləndirilməsi planları, bərpaolunan enerji resurslarının “Qoca qitə”yə çatırılması üçün yeni layihələrin işlənib hazırlanması Gürcüstan-Azərbaycan münasibətlərinin daha da möhkəmlənməsinə gətirib çıxaracaq. Dünyada böhranın hökm sürdüyü bir vaxtda xatırlatmaq yerinə düşər ki, Gürcüstan Azərbaycan sayəsində enerji təhlükəsizliyi təmin olunmuş ölkələrdən biridir. Təsadüfi deyil ki, Azərbaycan Gürcüstana 3,4 milyard ABŞ dolları investisiya yatırmaqla, bu ölkəyə qoyulan sərmayənin həcminə görə ön sıralardadır.
Bölmənin digər xəbərləri
