Yanvar ayında Gürcüstana gələn turistlər arasında azərbaycanlılar üstünlük təşkil edib
Tbilisi, 5 fevral, AZƏRTAC
Cari ilin yanvar ayında Gürcüstanı 309 min 467 turist ziyarət edib. Bu da 2014-cü ilin yanvar ayı ilə müqayisədə 3 faiz azdır.
Gürcüstan Daxili İşlər Nazirliyinin analitik-informasiya departamentinin məlumatına görə, son illər ərzində ilk dəfədir ki, ölkəyə gələn turistlərin sayında azalma qeydə alınıb. Gürcüstana gələnlərin 111 min 622 nəfəri turistlər olub, 58 min 28-i tranzit keçidi edib. Qalan 139 min 817 nəfərin isə başqa məqsədlərlə ölkəyə gəldiyi bildirilir.
Gürcüstanı ziyarət edən xarici ölkə vətəndaşları arasında Azərbaycan vətəndaşları 92 min 844 nəfər olmaqla birinci yerdədir. İkinci yeri isə 84 min 368 nəfərlə Türkiyə tutur.
Hesabat dövründə bu ölkəyə 40 min 150 Rusiya vətəndaşı gəlib.
Yanvar ayında Avropa İttifaqı ölkələrindən 7576, Ukraynadan isə 7350 nəfər Gürcüstanda olub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
