MƏDƏNİYYƏT
YARAT-da növbəti sərgi - Yoxlanılıb, mina yoxdur!
Bakı, 5 dekabr, AZƏRTAC
Dekabrın 7-də YARAT Müasir İncəsənət Mərkəzi “Yoxlanılıb, mina yoxdur!” adlı qrup sərgisi açılacaq.
YARAT-dan AZƏRTAC-a bildirilib ki, sərgidə 6 azərbaycanlı rəssamın əsərləri nümayiş olunacaq.
Ekspozisiya Xanlar Qasımov, Orxan Hüseynov, Elturan Məmmədov, Kamilla Muradova, Vüsal Rəhim və Sabina Şıxlinskayanın YARAT-ın sifarişi ilə hazırlanan performans, videoinstalyasiya və qrafika əsərlərini bir araya gətirir. Əsərlər postmünaqişə dövrünün həssas sülh mövzusundan bəhs edərək, daha fundamental mədəni, sosial və ekoloji məsələlərə fokuslanır.
“Yoxlanılıb, mina yoxdur!” sərgisinə giriş mina sahəsinə bənzəyən ərazidən başlayır. Nyu-Yorkda yaşayıb-yaradan azərbaycanlı rəssam Xanlar Qasımovun yaradıcılıq yanaşmasının əsasında duran “insanları gözlənilməz hallara salmaq” formulunu bu sərgi üçün hazırlamış əsərində də tətbiq edərək, tarixi yaddaş, torpağın “yaddaşı” və mədəni irs mövzularına səslənir.
Sabina Şıxlinskayanın videoinstalyasiyası irs məzmununu davam etdirərək, mədəni soyqırımıdan (etnosid) bəhs edir və Qarabağ Xan Sarayı nümunəsində “təhlükəsiz gələcək” mesajını verir. Bu fikrin davamı olaraq, multidisiplinar rəssam Orxan Hüseynov minalardan təmizlənmiş əraziləri kosmosdan çəkilmiş fotolar ilə göstərir və təhlükəsizlik probleminin həm ekoloji, həm də sosial kontekstdə miqyasını tamaşaçının diqqətinə çatdırır. Elturan Məmmədov öz videoinstalyasiyasını yaradıcılığına xas olan lokal xüsusiyyətlər üzərində yaradaraq, postfaktum sosial reaksiyaları əks etdirir. Təhlükəsiz, canlı və ekoloji təmiz gələcək ideyalarını Vüsal Rəhim öz performansında vurğulayır. Bütün sadalananların fonunda Kamilla Muradovanın şəxsi hekayəsi əsasında yaradılmış, lakin kollektiv yaddaşda formalaşmış stereotip düşüncələrdən bəhs edən qrafikalar silsiləsi ekspozisiyanı tamamlayır.
Sərgi, müharibə dəhşətlərinə sinə gəlmiş və daha da güclənən cəmiyyətdən söz açır - sülhə can atmağın təkcə kollektiv istək deyil, həm də gerçəklik olduğunu nümayiş etdirməyə istiqamətlənib. Şəxsi hekayələr, araşdırmalar və tarixi artefaktlar vasitəsilə sərgi yeni tarixin yaradılmasında, habelə zorakılıqdan uzaq azad gələcəyin formalaşdırılmasında barışığın, əməkdaşlığın və mərhəmətin rolunu diqqətə çatdırır.
Sərginin kuratoru Fərəh Ələkbərlidir.
Qeyd edək ki, Ermənistanın işğalı nəticəsində minalar Azərbaycanda əsas təhlükələrdən birinə çevrilib və bu gün ölkəmiz dünyada mina ilə ən çox çirkləndirilmiş ölkələr arasındadır. 2020-ci ilin noyabrından indiyədək 300-dən çox Azərbaycan vətəndaşı mina terroru nəticəsində həlak olub və ya ağır yaralanıb. Bu terror fundamental hüquq normalarını pozaraq, həm də həssas sülh mövzusuna-arzusuna kölgə salır. Müharibənin bitməsinə baxmayaraq, partlayan minaların böyük əksəriyyəti 2020-ci ildən sonra istehsal olunmuşdur. Minalanma təkcə insanlıq əleyhinə cinayət deyil, həm də ekologiya və mədəni irsə qarşı olan bir mexanizmdir.
Sərgi aprelin 27-dək ziyarətçilər üçün açıq olacaq.