Yaxın Şərqdəki gərginlik fonunda Qazaxıstan aviaşirkətlərinin bəzi reysləri ləğv edilib
Astana, 24 iyun, AZƏRTAC
Qazaxıstan aviaşirkətləri aparılan risk qiymətləndirmələrinə əsaslanaraq və təhlükəsizlik səbəbi ilə Dubay və Dohaya bir sıra reysləri ləğv etmək qərarına gəliblər.
AZƏRTAC Qazaxıstan Respublikasının Nəqliyyat Nazirliyinə istinadla xəbər verir ki, Yaxın Şərqdə hərbi-siyasi vəziyyətin kəskin gərginləşməsi ilə əlaqədar region ölkələrinin bir çoxu mülki aviasiya üçün rəsmi olaraq məhdudiyyətlər tətbiq edib və ya öz hava məkanını tamamilə bağlayıb.
“Silahdan istifadə təhlükəsi, naviqasiya sistemlərinin işindəki nasazlıqlar, hava hücumundan müdafiə sistemlərinin fəaliyyəti və mülki aviasiya vasitələrinin uçuşları üçün yüksək risklər səbəbindən məcburi tədbirlər görülüb”, -deyə məlumatda deyilir.
Nazirlik vurğulayır ki, Qazaxıstan aviaşirkətlərinin Körfəz ölkələrinə uçuşları ləğv etməsi regionda hərbi-siyasi vəziyyətin kəskin şəkildə gərginləşməsi fonunda məcburi və əsaslandırılmış tədbirdir. Qəbul edilən qərarlar beynəlxalq təcrübəyə uyğundur, həmçinin sərnişinlərin və ekipajların təhlükəsizliyinin təmin edilməsinə yönəlib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
