YOHAN TSÜLKE: “ƏSAS MƏQSƏDİM KAYAKÇILARI QARŞIDAKI NÜFUZLU YARIŞLARA HAZIRLAMAQDIR”
Bakı, 13 iyun (AZƏRTAC). Azərbaycan Milli Avarçəkmə Federasiyasından bildirmişlər ki, almaniyalı mütəxəssis Yohan Tsülke kayak üzrə yeniyetmə (U-18) və gənclərdən (U-23) ibarət Azərbaycan milli komandasının baş məşqçisi kimi fəaliyyətə başlamışdır.
Artıq üç həftədir ki, ölkəmizdə olan Y.Tsülke hazırda Mingəçevir şəhərində perspektivli kanoeçilərimizin hazırlığı ilə məşğuldur. Tsülke əsas məqsədinin kayakçılarımızı qarşıdakı 3 mötəbər yarışa hazırlamaqdan ibarət olduğunu söyləmişdir. İlk yarış iyunun 25-dən 28-dək Almaniyanın Brandenburq şəhərində təşkil ediləcək kayak və kanoe üzrə böyüklər arasında Avropa çempionatıdır. Qitə çempionatında kanoeçilərimizdən Valentin Demyanenko 1 nəfərlik, Sergey Bezuqlıy-Maksim Prokopenko dueti isə 2 nəfərlik qayıqlarda mübarizə aparacaqlar. Çempionatda ölkəmiz kayak növündə də təmsil olunacaqdır.
İyulun 16-dan 19-dək isə yeniyetmə və gənclərdən ibarət yığma komandamız kayak və kanoe üzrə Avropa çempionatına qatılacaqdır. Daha sonra idmançılarımız iyulun 31-dən avqustun 2-dək Rusiyanın paytaxtı Moskvada keçiriləcək dünya çempionatında mübarizə aparacaqlar. Bu yarış 2010-cu ildə Sinqapurda keçiriləcək Yeniyetmələrin Yay Olimpiya Oyunlarına lisenziya xarakteri daşıyacaqdır.
Qarşıdakı yarışlarda kayakçılarımızın 9 idmançının mübarizə apardığı final mərhələsinə düşəcəyinə ümid etdiyini deyən baş məşqçi gələcək taleyinə məhz Avropa və dünya çempionatlarından sonra aydınlıq gələcəyini bildirmişdir: “Vaxtımız az, görüləsi işlərimiz isə çoxdur. Ona görə də kayakçıların Azərbaycanı layiqincə təmsil etmələri üçün bütün imkanlarımızı səfərbər etmişik. Ümid edirik ki, əziyyətimiz hədər getməyəcəkdir. Həm də bu yarışların nəticələrinə əsasən, mənim Azərbaycan millisində qalıb-qalmayacağım müəyyənləşəcəkdir”.
Bölmənin digər xəbərləri
