Yunanıstan meşə yanğınları ilə mübarizədə kosmik texnologiyaları tətbiq edən ilk ölkə olub
Buxarest, 28 iyun, AZƏRTAC
Yunanıstan meşə yanğınları ilə mübarizə sisteminə xüsusi peyk şəbəkəsini tam inteqrasiya edən dünyada ilk ölkə olub. Yeni texnologiya yanğınların ilkin mərhələdə aşkarlanmasına, operativ qərarların qəbul edilməsinə və fövqəladə hallara daha sürətli reaksiya verilməsinə imkan yaradır.
AZƏRTAC xəbər verir ki, bu barədə Rumıniyanın “Mediafax” agentliyi yazır. Məlumata görə, bu ilin may ayında Yer orbitinə buraxılan dörd kiçik peyk artıq Yunanıstanın milli yanğınsöndürmə sisteminin tərkib hissəsinə çevrilib. Almaniyanın “OroraTech” şirkəti tərəfindən hazırlanan peyklər termal sensorlarla təchiz olunub və eni cəmi dörd metr olan yanğın ocaqlarını belə müəyyən edə bilir. Bu göstərici ənənəvi peyk sistemlərinin imkanlarını xeyli üstələyir.
“Mediafax” qeyd edir ki, peyklərdən əldə olunan məlumatlar süni intellekt vasitəsilə emal edilir. Sistem yanğının dəqiq koordinatlarını, ölçüsünü və intensivliyini avtomatik müəyyən edərək operativ qərargahlara ötürür. Eyni vaxtda bir neçə yanğın baş verdikdə isə proqram hansı əraziyə daha çox qüvvə və texnika yönəldilməli olduğunu müəyyənləşdirməyə kömək edir. Məqalədə vurğulanır ki, süni intellekt sistemi günəş panelləri, isti sənaye obyektləri və günəşdən qızmış qayalıqlar kimi yanlış siqnalları da ayırd edə bilir. Bu, fövqəladə hallar xidmətlərinin yalnız real təhlükələrə operativ reaksiya verməsinə şərait yaradır.
Nəşr yazır ki, yeni peyk sistemi dronlar və yerüstü müşahidə sensorlarını tamamlayır. Yunanıstan 2018-ci ildə Afina yaxınlığında 100-dən çox insanın həyatına son qoyan dağıdıcı meşə yanğınlarından sonra erkən xəbərdarlıq və monitorinq sistemlərinin modernləşdirilməsinə böyük sərmayə yatırıb. “Mediafax”ın məlumatına görə, bu təşəbbüs Avropa İttifaqının maliyyələşdirdiyi, ümumi dəyəri 200 milyon avro olan daha geniş kosmik müşahidə proqramının tərkib hissəsidir. Layihə çərçivəsində termal peyklərlə yanaşı, tüstü və buludları müşahidə edə bilən radar peykləri, eləcə də yüksək dəqiqlikli optik peyklərdən ibarət vahid müşahidə şəbəkəsinin yaradılması nəzərdə tutulur.
Məqalədə qeyd olunur ki, gələcəkdə bu texnologiyadan yalnız meşə yanğınlarının aşkarlanması üçün deyil, həm də sərhədlərin monitorinqi, kənd təsərrüfatı, təbii fəlakətlərin idarə olunması, şəhərlərdə istilik adalarının müəyyən edilməsi və iqlim risklərinin qiymətləndirilməsi məqsədilə istifadə olunacaq.
Nəşrin qənaətinə görə, Yunanıstanın həyata keçirdiyi bu layihə Avropanın kosmik texnologiyalar sahəsində müstəqilliyini gücləndirmək strategiyasının mühüm hissəsidir. Geosiyasi gərginlik və iqlim dəyişikliklərinin yaratdığı yeni çağırışlar fonunda Avropa ölkələri kosmik müşahidə və süni intellekt əsaslı erkən xəbərdarlıq sistemlərinə daha çox investisiya yatırırlar.
Bölmənin digər xəbərləri
