ZAQATALALI FERMERLƏR SATIŞ YARMARKALARINDA FƏAL İŞTİRAK EDİRLƏR
Rayon icra hakimiyyətindən AZƏRTAC-ın müxbirinə bildirmişlər ki, ötən həftə keçirilən yarmarkada da zaqatalalı fermerlər geniş çeşiddə kənd təsərrüfatı məhsullarını Suraxanı rayonunun Günəşli qəsəbəsindəki “Günəş” ticarət mərkəzində satışa çıxarmışlar. Alıcılara təklif edilən alma, armud, gavalı, zoğal, fındıq, bostan və tərəvəz məhsulları, sütül qarğıdalı, habelə quzu və quş əti, bal alıcılara bazar qiymətlərindən xeyli ucuz satılmışdır. Yarmarkada alma və armudun kiloqramı 20 qəpiyə, fındığın kiloqramı 50 qəpiyə, ətin kiloqramı 3 manat 60 qəpiyə, balın kiloqramı isə 5 manata satılmışdır. Paytaxt alıcıları Zaqatalada istehsal edilmiş qoz, gül və zoğal mürəbbələrinə xüsusilə böyük maraq göstərmiş, bu məhsulları həvəslə almışlar. Ümumiyyətlə, zaqatalalı fermerlər iştirak etdikləri son 2 yarmarkada paytaxt alıcılarına 12 tondan artıq müxtəlif növ kənd təsərrüfatı məhsulları satmışlar.
Torpaq sahibləri, alıcılar yarmarkaların təşkilinə görə dövlətimizin başçısına, eləcə də, əlaqədar orqanlara minnətdarlıqlarını bildirir, yarmarkaların davamlı olmasını arzulayırlar.
Bölmənin digər xəbərləri
