Zəfər və Şərəf tariximizin başlandığı gün ŞƏRH
Bakı, 27 sentyabr, AZƏRTAC
İkinci Qarabağ müharibəsində həyatını itirən igid övladlarımızın xatirəsinin anılması kimi tariximizə və qan yaddaşımıza həkk olunan 27 Sentyabr Prezident İlham Əliyevin 2020-ci il 2 dekabr tarixli Sərəncamı ilə əbədiləşdirilib. Xalqımız artıq 4 ildir ki, şərəf və qəhrəmanlıq tariximizin başlanğıcı olan Anım Gününü alnıaçıq, üzüağ və qürurla qeyd edir.
Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.
O bildirib ki, düz 4 il bundan əvvəl Ermənistan ordusunun Azərbaycana qarşı genişmiqyaslı hərbi təxribatı ilə başlayan müharibə 30 ildir həll edilməsi müşkül görünən problemi xeyrimizə tamamlamağa imkan verdi. Dünyanın gözü önündə, beynəlxalq hüququn norma və prinsiplərini kobud şəkildə pozaraq ərazilərimizi qəsb edən Ermənistan ona havadarlıq edən dairələrə güvənərək torpaqlarımızı daim işğal altında saxlayacağını güman edirdi. İşğalçı dövlət ona edilən böyük yardımlardan, Birinci Qarabağ müharibəsindəki qeyri-bərabər, haqsız döyüşdən ruhlanaraq özünün “yenilməz” orduya malik olması mifini bütün dünyaya yaymışdı.
Ərazisi işğala məruz qalan, maddi-mənəvi abidləri məhv edilən, bir milyona yaxın vətəndaşı məcburi köçkün vəziyyətinə düşən Azərbaycan dünyada bənzəri olmayan nəciblik göstərərək bu problemin danışıqlar, sülh yolu ilə həllinin tərəfdarı olduğunu bəyan edirdi. Beynəlxalq hüququn da tərəfimizdə olmasına baxmayaraq, ölkəmiz təmkin nümayiş etdirir, təcavüzkar dövlətin müzakirə masasına gələcəyini gözləyirdi. Lakin öz mənfur xislətinə sadiq qalan Ermənistan torpaqlarımızı tərk etmək niyyətində deyildi, sadəcə, vaxt uzadaraq ərazilərimizdə möhkəmlənməyə çalışırdı, mütəmadi olaraq keçmiş təmas xətti adlanan ərazidə təxribatlar törədirdi.
Bu cür təxribatlardan biri də 2016-cı ildə baş verdi. Təxribatın qarşısının alınması məqsədilə başladılan uğurlu əks-hücum əməliyyatı Azərbaycana çox mühüm psixoloji qələbə qazandırdı. Bununla da Azərbaycan öz torpaqlarını azad etmək bacarığını, potensialını, döyüş əzmini nümayiş etdirdi. Dördgünlük döyüşlərin əks-sədası isə bütün dünyaya yayıldı və Ermənistanın Azərbaycan torpaqlarının 20 faizini işğal altında saxlaması bir daha beynəlxalq ictimaiyyətə xatırladıldı və məğlubedilməz ordu mifi yerlə bir oldu”.
Ulu Öndər Heydər Əliyevin hakimiyyəti dövründə formalaşdırılmış Milli Ordumuzun Prezident İlham Əliyevin hakimiyyəti dövründə keyfiyyətcə yeni mərhələyə qədəm qoyduğunu deyən deputat, həmçinin vurğulayıb: “Silahlı Qüvvələrimizin peşəkarlığının artırılması, şəxsi heyətin döyüş ruhunun, mənəvi-psixoloji hazırlığının yüksəldilməsi, ordumuzun ən müasir silah və texnika ilə təchizatı istiqamətində təxirəsalınmaz təbirlər görüldü. Azərbaycan Silahlı Qüvvələri ildən-ilə güclənərək regionun ən qüdrətli ordusuna çevrildi. Dövlətimizin başçısının uzaqgörən, uğurlu siyasəti artıq Azərbaycanı öz məqsədlərinə, tarixi Qələbəyə addım-addım yaxınlaşdırırdı. Beləliklə, 2020-ci ildə başlayan Vətən müharibəsi regionun arxitekturasını dəyişməklə bərabər, xalqımızın 30 illik arzularını, yurd həsrətini, həmçinin tarixi ədaləti bərpa etdi. Ölkəmizə qarşı yönələn bütün təzyiqlərə baxmayaraq, Azərbaycan Ordusu üzərinə düşən vəzifəni şərəflə, ləyaqətlə yerinə yetirdi. Xalq-iqtidar-ordu birliyi Zəfərimizin 44 gündə tamamlanmasına öz töhfəsini verdi. Hər kənd, hər qəsəbə, hər rayon və şəhər uğrunda qanlı döyüşlər uzun illərin məhrumiyyətini, acısını unutdurmaqla bərabər, düşməndə ruh düşkünlüyü yaratdı, bu da döyüşlərin tez bitməsinə səbəb oldu. Nəhayət 2020-ci il noyabrın 10-da imzalanan üçtərəfli Bəyanatla Ermənistan kapitulyasiya aktına imza atmağa məcbur oldu, Ağdam, Kəlbəcər və Laçın döyüşsüz boşaldıldı və Azərbaycanın ərazi bütövlüyü təmin edildi. Lakin üçtərəfli Bəyanata əsasən, üzərinə götürdüyü öhdəlikləri yerinə yetirməyən Ermənistan qanunsuz silahlı birləşmələrini ərazilərimizdən çıxarmadı, hətta yeni döyüş mövqeləri yaratdı, torpaqlarımızı minalamağa davam etdi. Üçtərəfli Bəyanatın müddəalarına zidd olaraq Azərbaycanın Qarabağ bölgəsindəki Ermənistan silahlı qüvvələrinin birləşmələrinin mövcudluğunu davam etdirməsi regional sülh və sabitlik üçün ciddi təhlükə mənbəyi idi. Buna görə də Azərbaycan Konstitusiya quruluşunun bərpa edilməsi məqsədilə Qarabağda lokal xarakterli antiterror tədbirlərinə başladı və bir gündən də az müddətdə separatçılar təslim oldu. Beləliklə, Müzəffər Ali Baş Komandan İlham Əliyevin rəhbərliyi, Ordumuzun əzmi, gücü, şücaəti sayəsində ərazi bütövlüyümüz və suverenliyimiz bərpa olundu, respublikanın bütün ərazisində Azərbaycanın Dövlət Bayrağı dalğalandırıldı”.
Bölmənin digər xəbərləri
