Zelenski ABŞ-ın “sülh planı” fonunda mövqeyini açıqlayıb
Kiyev, 20 noyabr, AZƏRTAC
Ukrayna anlamlı formatlarda sülhün bərqərar olması üçün işləməyə hazırdır. Müharibəyə son qoymağa yalnız ABŞ Prezidenti Donald Trampın gücü çatır.
AZƏRTAC xəbər verir ki, bu barədə Ukrayna Prezidenti Volodimir Zelenski “Teleqram” səhifəsində məlumat verib.
“Bu ilin əvvəlindən biz Ukraynada Prezident Trampın bütün qəti addımlarını və rəhbərliyini, bu müharibəyə son qoymaq üçün hər bir güclü və ədalətli təklifi dəstəkləmişik. Və yalnız Prezident Tramp və Amerika Birləşmiş Ştatlarının nəhayət müharibəni bitirmək gücü var", - deyə Zelenski qeyd edib.
Zelenskinin sözlərinə görə, Ankarada görüş zamanı Ərdoğan danışıqlar üçün formatlar təklif edib və bu formatları dəstəkləyib. Ukrayna isə Türkiyənin bunun üçün platforma verməyə hazır olduğunu yüksək qiymətləndirir.
"Biz nəticə verə biləcək istənilən digər mənalı formatlarda işləməyə hazırıq. Amma qan tökülməsinə son qoymaq və davamlı sülhə nail olmaq üçün ən vacibi odur ki, biz bütün tərəfdaşlarla koordinasiyada çalışaq və Amerika rəhbərliyi effektiv, güclü olaraq qalsın və davamlı, insanların təhlükəsizliyini təmin edəcək sülhə nail olsun", deyə Prezident əlavə edib.
Xatırladaq ki, noyabrın 19-da xarici KİV-də Amerika və Rusiya rəsmilərinin Rusiyanın Ukraynaya qarşı müharibəsinə son qoymaq üçün “sülh planı” hazırladıqları barədə məlumatlar yayılıb.
Göründüyü kimi, bu planda Ukraynanın yerinə yetirməsi mümkün olmayan şərtlər var. Konkret olaraq, bu, Donbasa nəzarətin Rusiyaya verilməsini və Ukrayna qoşunlarının sayının əhəmiyyətli dərəcədə azaldılmasını nəzərdə tutur.
AZƏRTAC-ın xüsusi müxbiri
Kiyev
Bölmənin digər xəbərləri
