“108” Çağrı Mərkəzinə indiyədək 11 milyona yaxın zəng daxil olub
Bakı, 24 aprel, AZƏRTAC
“108” Çağrı Mərkəzi 2013-cü il fevralın 1-də fəaliyyətə başlayıb. Bu, "ASAN xidmət" və "ASAN Kommunal" mərkəzlərində göstərilən xidmətlərlə bağlıdır. Həmin xidmətlərin alınması üçün tələb olunan sənəd toplusu, rüsumlar və xidmət haqları ilə bağlı məlumatları vətəndaşlar “108” Çağrı Mərkəzi ilə əlaqə saxlayaraq əldə edə bilərlər.
AZƏRTAC xəbər verir ki, bunu jurnalistlərə açıqlamasında "ASAN xidmət"in Çağrı Mərkəzinin müdiri Nərmin Mehtiyeva deyib.
O bildirib ki, "ASAN xidmət" mərkəzlərində göstərilən xidmətlərin sayı artıq 400-ə çatıb. “Hər bir xidmətlə bağlı yaranan təklif və şikayətlərin də “108” Çağrı Mərkəzi vasitəsilə rəsmiləşdirilməsinə kömək edirik. Gün ərzində Çağrı Mərkəzimiz 5 min müraciət qəbul edir. Onlardan 3000-3500-nü zənglər, qalan hissəsini isə yazılı müraciətlər təşkil edir. İndiyə qədər qəbul olunan zəng sayı 11 milyona çatır”, - deyə Nərmin Mehtiyeva vurğulayıb.
Onun sözlərinə görə, Çağrı Mərkəzi ilə telefon vasitələrindən əlavə digər alternativ üsullarla da əlaqə saxlamaq mümkündür: "ASAN xidmət" mərkəzinin rəsmi internet səhifəsində mövcud olan onlayn çat bölməsi, sosial şəbəkələr, elektron poçt ünvanı, "ASAN xidmət" mərkəzlərində yerləşən videoqəbul köşkləri, həmçinin vətəndaşların “108” Çağrı Mərkəzi ilə ödənişsiz şəkildə əlaqə saxlaması üçün hər bir “ASAN xidmət” mərkəzində stasionar telefon köşkləri də quraşdırılıb. “108” Çağrı Mərkəzi bazar ertəsi - cümə günləri 09:00-dan 18:00-dək canlı iş rejimində, bayram və istirahət günlərində isə 24 saatlıq avtomatlaşdırılmış rejimdə çalışan səsli məlumatlandırma sistemi ilə fəaliyyət göstərir”.
Müxbir - Göyçək Mahmudlu
Bölmənin digər xəbərləri
