REGİONLAR
Gədəbəydə 3 istiqamət üzrə 29 kilometr yol yenidən qurulur VİDEO
Bakı, 21 iyun, AZƏRTAC
Gədəbəy rayonunda uzunluğu 29 kilometr olan respublika əhəmiyyətli Şəmkir-Gədəbəy avtomobil yolunun 30-cu kilometrindən ayrılan və 20 kilometr uzunluğa malik yerli əhəmiyyətli Slavyanka-Qoşabulaq-Pərizamanlı, həmçinin 6,1 kilometrlik Çanaqçı-Haçaqaya və 2,9 kilometrlik Qoşabulaq-Sarıtala avtomobil yolları əsaslı şəkildə yenidən qurulur.
Bu barədə AZƏRTAC-a Azərbaycan Avtomobil Yolları Dövlət Agentliyinin mətbuat xidmətindən bildirilib.
IV texniki dərəcəyə uyğun olaraq yenidən qurulan yolun eni 6-7 metrdən 10 metrə qədər genişləndirilib. Həmçinin yolun normativ eninin alınması üçün 17,5-20-ci kilometrlik hissələrdə sol tərəfdə qaya tipli süxurların kəsilməsi, həmçinin yolun torpaq yatağının bərpası üçün yararsız qruntun qazılması və çınqıl materialı ilə yolun genişləndirilməsi işləri aparılıb.
Layihə çərçivəsində, mövcud suötürücü borular istismara yaramadığı üçün yolboyu 19 yerdə uzunluğu 223 poqonmetr olan müxtəlif diametrli dəmir-beton borular quraşdırılıb, yolun 6, 7, 8 və 10-cu kilometrində yerləşən düzbucaqlı formalı suötürücü boruların başlıqları dəmir-betonla təmir olunub. Eyni zamanda yolun 1-ci kilometrində uzunluğu 6 metr, eni isə 8 metr olan körpü hər iki tərəfdən 1,2 metr genişləndirilib, Çanaqçı kəndi ərazisində 250 metr uzunluğunda "U" şəkilli dəmir-beton küvetlər quraşdırılıb və tələb olunan yerlərdə küvetlər açılıb.
Yol yatağı hazır olan hissələrdə yol əsasının optimal qum-çınqıl materialı ilə inşası işləri aparılıb. Daha sonra əlaqələndirici bitum səpilməklə yol örtüyünün alt və üst qatlarının asfalt-beton qarışığı ilə tikintisi işlərinə başlanılıb. Artıq yolun 13 kilometrlik hissəsinin alt layının asfalt-betonla tikintisi yekunlaşdırılıb, digər hissələrdə isə davam etdirilir. Ümumilikdə yolun 120 min kvadratmetr sahəsinə 12 santimetr qalınlığında asfalt-beton örtüyünün döşənməsi nəzərdə tutulub.
Analoji işlər 2,9 kilometrlik Qoşabulaq-Sarıtala və 6,1 kilometrlik Çanaqçı-Haçaqaya avtomobil yollarında da aparılır.
Sözügedən yollarda torpaq yatağının IV texniki dərəcəyə uyğun 10 metr təşkil edən normativ eninin alınması üçün zəruri olan yerlərdə yararsız qrunt qazılır, yararlı karxana çınqılı tökülərək genişləndirilir və kipləşdirilir, profilə salınır, çiyinlər bərkidilir.
Bundan başqa, yollar boyu 6 yerdə uzunluğu 82 poqonmetr olan müxtəlif diametrli dəmir-beton boruların quraşdırılması, boru başlıqlarının dəmir-betonla təmiri, əsasın və örtüyün müxtəlif qalınlıqlara optimal qum-çınqıl materialı ilə tikintisi işləri də aparılır.
Tikinti işlərinin sonuncu mərhələsində hərəkətin normal təşkili üçün sadalanan yollar boyu 96 ədəd yol nişanı, 830 ədəd siqnal dirəkləri, həmçinin yolun təhlükəli hissələrində və körpülərə yanaşmalarda 1280 poqonmetr əyrixətli dəmir tirlər quraşdırılacaq, 40 kilometr yolun üfüqi nişanlanma xətləri çəkiləcək.
Yenidənqurma işləri mövcud tikinti norma və standartlarına uyğun, texnoloji ardıcıllıqla aparılır. Tərtib olunmuş qrafikə uyğun işlərin başa çatdırılması üçün ərazidə lazımi sayda canlı qüvvə və texnika çalışır.
Qeyd olunub ki, Slavyanka-Qoşabulaq-Pərizamanlı, Çanaqçı-Haçaqaya və Qoşabulaq-Sarıtala avtomobil yollarının yenidən qurulması ilə 11,5 min nəfər əhalinin yaşadığı 8 yaşayış məntəqəsinin nəqliyyat əlaqəsi yaxşılaşacaq, vətəndaşlar rayon mərkəzinə və qonşu rayonlara rahat çıxış əldə edəcək, yük və sərnişin daşınması asanlaşacaq.