Xaçmaz, 24 iyun, Elxan Yusifli, AZƏRTAC

Xaçmazda dünya şöhrətli bəstəkar, SSRİ Xalq Artisti, Dövlət mükafatı laureatı Qara Qarayevin 100 illik yubileyi münasibətilə konsert proqramı təqdim olunub.

AZƏRTAC-ın bölgə müxbiri xəbər verir ki, Xaçmaz Regional Mədəniyyət İdarəsinin Üzeyir Hacıbəyli adına Bakı Musiqi Akademiyası (BMA) ilə birgə təşkil etdiyi konsertdə akademiyanın müəllim və tələbə heyəti klassik musiqi nömrələrini səsləndiriblər.

Xaçmaz Regional Mədəniyyət İdarəsinin rəisi Nazim Ağayev ölkəmizdə elm, ədəbiyyat, mədəniyyət və incəsənət xadimlərinə göstərilən diqqət və qayğıdan danışıb, Azərbaycan Prezidentinin müvafiq Sərəncamına əsasən Qara Qarayevin 100 illik yubileyinin dövlət səviyyəsində qeyd edildiyini vurğulayıb.

BMA-nın elmi işlər üzrə prorektoru, professor Gülnaz Abdullazadə çıxışında bildirib ki, Qara Qarayev Azərbaycanın bəşər mədəniyyətinə bəxş etdiyi fitri istedada malik sənətkarlardan biri olub. O, milli musiqimizi klassik və müasir janrlarla sintez etməklə unudulmaz əsərlər yaradıb. Bunların arasında “Yeddi gözəl”, “İldırımlı yollarla” baletləri, “Leyli və Məcnun” simfonik poeması xüsusilə fərqlənir.

Konsert proqramından əvvəl görkəmli bəstəkara həsr olunmuş film nümayiş etdirilib.

Q.Qarayevin müxtəlif janrlarda əsərlərindən ibarət musiqi nömrələri tamaşaçıların zövqünü oxşayıb.