Bakı, 2 iyul, AZƏRTAC

İyunun 30-da istedadlı gənc pianoçu, beynəlxalq müsabiqələr laureatı Ayla Kəlbiyevanın “Məhəbbət əfsanəsi” adlı solo konserti olub.

AZƏRTAC xəbər verir ki, konsertdə Azərbaycan və dünya bəstəkarlarının əsərləri səsləndirilib. Bu il Azərbaycan Milli Konservatoriyasının nəzdində İncəsənət Gimnaziyasının VII sinfini bitirən Ayla Kəlbiyeva xeyli müddətdir ki, Xalq Artisti Fidan Hacıyevanın Vokal Musiqi Məktəbində də vokal dərsləri alır.

On iki yaşlı qızın böyük ürəyi

Ayla Kəlbiyeva solo konsertini Şəhidlər xiyabanında uyuyan İlham və Fərizənin xatirəsinə ithaf edib. Axı iyunun 30-da İlham və Fərizənin - iki sevən qəlbin keşməkeşli həyat yoluna birgə qədəm qoymasının 29 ili tamam oldu. 1990-cı ilin qanlı Yanvarı İlhamı Fərizədən ayırsa da, gənc qadın ölümə meydan oxudu və bətnindəki körpəni də özü ilə haqq dünyasına apardı.

Solo konsertdən əvvəl İlham və Fərizənin xatirəsi bir dəqiqəlik sükutla yad edilib.

Yaradıcı şəxslərin xalqın sevincli və kədərli gününə özünəməxsus yanaşması olur. Evində, məktəbdə, əhatə olunduğu mühitdə həm də vətənpərvər ruhda tərbiyə alan 12 yaşlı Ayla da solo konsertində incə barmaqları ilə əfsanəyə dönmüş məhəbbət tarixindən söz açıb, Qara Qarayevin əsərini ifa etməklə, İlham və Fərizəyə, bu təzadlı dünyaya göz aça bilməyən körpəyə “Lay-lay” deyib.

Nakam sevgi, yanan şamlar, qızılgül ləçəkləri

“Yaxt-klub”da keçirilən konsertdə gənc pianoçunun çıxışı, zalın tərtibatı, yanan şamlar, yerə səpilən qızılgül ləçəkləri tamaşaçılara sevgililərin nakam dünyasından söz açırdı. Ayla Kəlbiyeva F.Mendelsonun “Sözsüz mahnı”sını səsləndirməklə XIX əsrdə bəstələnmiş bu əsərə yaşadığımız dövrün çağırışları baxımından yanaşdı. Öz məharətli ifası ilə tamaşaçılara İlham və Fərizənin həqiqi məhəbbəti qarşısında qəhərdən sözün tükəndiyini söylədi.

Dünya klassik bəstəkarlarının əsərlərini yorulmadan öyrənən Ayla F.Listin “Loreleya” əsəri ilə tamaşaçılara Reyn çayı sahilində Lora və onun zadəgan sevgilisinin nakam məhəbbətindən danışdı.

Əfsanəyə dönmüş bütün nakam məhəbbət qəhrəmanlarının ruhu bəlkə də həmin gecə gənc istedadın işığına toplaşmışdı. Aylanın ifasında F.Şopenin “Vals”ını dinləyən tamaşaçılar xəyalən nakam sevgililərin valsını görürdülər.

Fidan Hacıyeva: Musiqimizi uğurla təbliğ edən Ayla ilə qürur duyuram

Gecənin yaddaqalan məqamlarından biri isə Xalq Artisti Fidan Hacıyevanın Aylanın müşayiəti ilə “Axşam mahnısı”nı (musiqisi Tofiq Quliyev) ifa etməsi olub.

“Azərbaycan musiqisini həm ölkədə, həm də dünyada uğurla təbliğ edən Ayla ilə qürur duyuram”, - deyən Xalq Artisti Fidan Hacıyeva rəhbərlik etdiyi Vokal Musiqi Məktəbinin tərifnaməsini Ayla Kəlbiyevaya təqdim edib. Diqqətə çatdırıb ki, Aylanın həm də gözəl səsi var. Mahnı ifa etməyə yeni başlayan istedadlı qızı bu sahədə də uğurlar gözləyir.

Xatırladaq ki, Vokal Musiqi Məktəbinin martın 18-də Rəşid Behbudov adına Dövlət Mahnı Teatrında təqdim etdiyi “Baharın səsi” adlı konsert proqramında Xalq Artisti Fidan Hacıyevanı ifalarından birini fortepianoda Ayla Kəlbiyeva müşayiət etmişdi.

2005-ci il oktyabrın 6-da Bakıda dünyaya gəlmiş Ayla Kəlbiyeva 5 yaşında Respublika Uşaq Filarmoniyasında Oqtay Zülfüqarovun şagirdi olub, 6 yaşında müsabiqə yolu ilə Respublika İncəsənət Gimnaziyasının fortepiano sinfinə qəbul edilib. Əməkdar Müəllim Nigar Nəcəfovadan dərs alan Ayla çox keçmir bu sənətdə nailiyyətlər qazanmağa başlayır. Belə ki, 2013-cü ildə Maltada “Violin and friends” beynəlxalq müsabiqəsində üçüncü yerə çıxıb. Buradakı ifasına görə, o, həm də xüsusi diplom alıb. 2014-cü ildə Fransada N.Rubinşteyn adına XII beynəlxalq fortepiano müsabiqəsində və 2015-ci ildə İtaliyada “Citta di Pesaro” XII beynəlxalq musiqi müsabiqəsində ikinci yerə çıxıb. On yaşında ABŞ-ın Nyu-York şəhərində “American Protege” Beynəlxalq Fortepiano Müsabiqəsinin qalibi olub, nüfuzlu “Carnegie Hall”da çıxış edib. 2017-ci ildə “Stars at Tenerife” beynəlxalq musiqi müsabiqəsində ikinci yeri tutub. Almaniyanın Baden-Vürtemberq şəhərində pianoçuların “Musical Fireworks” beynəlxalq müsabiqəsində birinci yerə layiq görülüb. Bu günlərdə isə Türkiyədə keçirilən Beynəlxalq Fortepiano Müsabiqəsində birinci yeri tutub. Ayla həm də dərs əlaçısıdır.

Fidan xanım gənclərin istedadını zərgər dəqiqliyi ilə üzə çıxarır

Solo konsertdən sonra çıxış edən tədbir iştirakçıları Ayla Kəlbiyevanın istedadından söz açıb, Xalq Artisti Fidan Hacıyevanın bu cür gənclərə dəstəyini vurğulayıblar.

Əməkdar Müəllim Nigar Nəcəfova Aylanın istedadı ilə yanaşı, onun zəhmətsevərliyini qeyd edib, ona dəstək olan hər kəsə minnətdarlığını bildirib.

Bakı Biznes Universitetinin rektoru İbad Abbasov bu cür istedadlı gəncləri aşkar etməyin özlüyün də bir istedad olduğunu deyib: “Xalq Artisti Fidan Hacıyeva gənclərin istedadını zərgər dəqiqliyi ilə üzə çıxarır. Hər sənətkara öz məktəbini yaratmaq, biliyini, təcrübəsini gənc nəslə ötürmək nəsib olmur. Lakin Fidan xanım bunu bacarıb. Vokal Musiqi Məktəbini yaratmaq böyük təşkilati məsələdir. Əminəm ki, Siz bu təcrübənizlə də tanınacaq, məktəbiniz gələcəkdə akademiyaya çevriləcək. Ayla Kəlbiyevanın qazandığı uğurlar bizi çox sevindirir. Belə istedadlı uşaqların sayının çox olmasını arzulayıram”.

Aylanın anası: Övladımın üzərində əməyi olan hər kəsə minnətdaram

Çıxışlarda Ayla Kəlbiyevanın beynəlxalq müsabiqələrdə qazandığı uğurların həm də ölkəmizin uğurları olduğu qeyd olunub.

Ayla Kəlbiyevanın anası Sevda xanım övladının musiqi istedadının üzə çıxarılmasında əməyi olan, onu dəstəkləyən hər kəsə təşəkkürünü bildirib. “Xalq Artisti Fidan Hacıyeva sənətdə öz sözünü deyib. Onun kimi hər Xalq Artisti iki tələbəni bu cür zirvələrə qaldırsa, Azərbaycan musiqisinin gələcəyi olacaq nə qədər istedadlar üzə çıxarılar”, - deyən Sevda xanım, həmçinin Əməkdar Müəllim Nigar Nəcəfovanın Aylaya körpəlikdən sənətin sirlərini səbirlə öyrətməsini, ona analıq qayğısı ilə yanaşmasını diqqətə çatdırıb.

Nə qəşəngsən, nə gözəlsən, bu axşam, sən, əziz dost

Fidan Hacıyeva Vokal Musiqi Məktəbinin “Karmen” qrupunun və konsertmeyster Şahin Yəhyayevin müşayiət etdiyi konsertlə davam edən gecə xoş anlarla yadda qalıb.

Ayla Kəlbiyeva daha bir istedadını - vokal ifa etmək bacarığını nümayiş etdirib. Onun ifasında “Sevgi valsı” (musiqisi Tofiq Quliyev), bəlkə də, yeni məzmun kəsb edib, desək, yanılmarıq. Bu ifa vokal yoluna kövrək qədəmlərini qoyan qızın onu dəstəkləyənlərə sevgisinin ifadəsi kimi səsləndirildi. Gecəyə toplaşan sənətsevərlərin, Fidan Hacıyeva kimi xeyirxah insanların hər biri, mahnıda deyildiyi kimi, gözəl və qəşəng idi. “La Spangela” mahnısı isə Aylanın gələcək uğurlarından xəbər verir.

Xalq Artisti Fidan Hacıyevanın Aylanı dəstəkləyərək onunla birgə “Gözəlim, yar gözəlim” (“Arşın mal alan” operası) mahnısını ifa etməsi xüsusi alqışlarla qarşılandı. Eləcə də Xalq Artistinin “Mavi əbədilik” (musiqisi Müslüm Maqomayev) ifa etməsi gecəyə xüsusi rəng qatıb.

Gecədə Vokal Musiqi Məktəbinin yetirmələri Orxan Cabbarovun, Rəna Cəfərzadənin, Tural Tağıyevin, Aqşin Xudaverdiyevin ifasında Azərbaycan və xarici ölkə bəstəkarlarının əsərləri səsləndirilib. Şotlandiyalı Bob Petrin çıxışı dinləyicilərdə lirik duyğular yaşadıb. Tədbirin qonağı, Əməkdar İncəsənət Xadimi İlham Nəcəfov isə saksofonda caz-muğam sintezi nümunələri ilə musiqili gecəni daha da canlandırıb.

Vokal Musiqi Məktəbin müəllimi Arzu Qurbanovanın Tural Tağıyevlə birgə “Yaşın nə fərqi var” dueti sevginin ülvi duyğu olmasını bir daha xatırladıb. Arzu Qurbanovanın ifasında şən mahnıların sədaları altında rəqsə qoşulan tədbir iştirakçıları konsertdən unudulmaz təəssüratlarla ayrılıblar.