REGİONLAR
Qubalı bağbanlar kütləvi alma yığımına hazırlaşırlar VİDEO
Quba, 19 avqust, Elxan Yusifli, AZƏRTAC
Qubalı bağbanlar kütləvi alma yığımına sentyabrın ikinci ongünlüyündən başlayacaq.
AZƏRTAC-ın bölgə müxbiri xəbər verir ki, “Slava pobeditelyam”, “Qrandşteyn”, “Papirovka”, “Anis” və digər tezyetişən alma sortlarının yığımı yekunlaşıb. Yığılan meyvə yerli və paytaxt bazarlarında, eləcə də respublikamızın digər bölgələrində satılıb. Tezyetişən almanın topdansatış qiyməti hər kiloqramı 40-50 qəpik arasında olub.
Təxminən bir aydan sonra kütləvi alma yığımına başlayacaq fermerlər bağlarda məhsuldarlığın ötən ilə nisbətən aşağı olduğunu bildirirlər. Bağbanlar bunu havaların çox quraq keçməsi və suvarmada yaranan çətinliklərlə əlaqələndirirlər.
Rayonun Alekseyevka kəndindən olan fermer Nurbaba Məmmədovun 0,9 hektar alma bağı var. Bağban almanın “Qolden” sortunu becərir. Keçən il 50 tondan çox məhsul toplayıb.
“Hər 20-25 gündən bir alma bağına su verilməlidir. Amma mən iki aydan sonra bağı suvara bildim. Bu, istər-istəməz məhsuldarlığa və meyvənin keyfiyyətinə mənfi təsir göstərir. 100 qramlıq alma su az veriləndə olur 50 qram. Alıcılar isə böyük ölçülü meyvəyə üstünlük verir. Keçən il məhsuldarlıq yaxşı idi. Amma satışda problemlər oldu. Dekabr ayında Rusiyaya meyvə aparılmasında yaranan məhdudiyyət bizə ziyan vurdu. Ümidvarıq ki, bu il satışda çətinliyimiz olmaz”, - deyə o söyləyib.
Hazırda təsərrüfat sahibləri məhsulun vaxtında toplanması üçün hazırlıq işlərini görürlər. Bağlarda cərgə araları təmizlənir, meyvə toplanacaq ərazilər və saxlanclar hazır vəziyyətə gətirilir.
Şimal bölgəsinin alma bağlarında daha çox məhsuldarlığı ilə seçilən “Qolden”, “Simirenko” sortları yetişdirilir. İntensiv bağçılıqla məşğul olan bağbanlar isə “Qrani smit”, “Fuji” sortlarına üstünlük verir.
Uzun illərdir meyvəçiliklə məşğul olan Valid Adayev 1 hektar meyvə bağında alma və armud yetişdirir. Ötən il həmin bağdan 25 ton məhsul yığıb. Fermer alma bağlarında məhsuldarlığın ötən illə müqayisədə nisbətən aşağı olduğunu deyir.
“Alma bağına lazımi aqrotexniki qulluğu etmişəm. Dərmanlamışam, gübrə vermişəm. Amma məhsul bu il zəifdir. Keçənilkinin yarısı qədər məhsul var. Həm də bizim suvarma ilə bağlı çətinliyimiz var. Havaların quraq keçməsi də məhsuldarlığa mənfi təsir göstərib. Su anbarları inşa olunsa, fermerlərin suvarmadakı çətinliyi aradan qalxar”, - deyə Valid Adayev bildirib.
Qubada 14 min hektara yaxın alma bağı var ki, bunun da təxminən 11 min hektara intensiv və superintensiv bağlardır. Hər il rayonun alma bağlarından 120-130 min ton məhsul yığılır.