REGİONLAR
Yonca əkininə maraq artıb – Neftçaladan reportaj VİDEO
Neftçala, 23 avqust, İsmayıl Cəfərli, AZƏRTAC
Ölkədə heyvandarlığın, quşçuluğun və arıçılığın inkişaf etdirilməsi, mal-qara və quş məhsullarının artırılması, məhsulun keyfiyyətinin yaxşılaşdırılması və onun maya dəyərinin aşağı salınmasında əsas məsələlərdən biri qiymətli yem bazasının yaradılmasıdır. Bu baxımdan Neftçalada yem bitkilərinin əkilməsi diqqət mərkəzindədir.
AZƏRTAC xəbər verir ki, ötən il Neftçala rayonunda 8526 hektar ərazidə yonca bitkisi əkilib. Fermerlər bu sahələrdən bir neçə dəfə biçin apararaq hər hektardan təxminən 400 ədəd yonca bağlaması əldə ediblər. Bu il də Neftçalanın yonca sahələrində vəziyyət ürəkaçandır. Fermerlər sahələrdən bol məhsul götürəcəklərinə əmindirlər.
Fermer Nurlan Hüseynov bu il 20 hektar sahədə əkin aparır. Deyir ki, gələn il üçün məhsuldarlığımız yaxşı olsa, daha yüksək nəticələr əldə edəcəyik: “Birinci biçin üçün biz bu il hər hektardan 350-370 ədəd ot götürmüşük. Növbəti biçinlərdə bu say daha da artacaq. Məhsuldarlıq bu il məni qane etsə, gələn il 25-30 hektar yonca sahəsi əkməyi qarşıya məqsəd qoymuşam. Dövlət Aqrar İnkişaf Mərkəzinin əməkdaşları sahəmizə mütəmadi baxış keçirirlər. Aqrotexniki qulluq göstərilir. Hər hansı çətinliyimiz yoxdur”.
Mütəxəssislər mütəmadi olaraq yonca sahələrində olur, fermerlərə müxtəlif tövsiyələr verirlər. Sahələrin suvarılması ilə yanaşı, ziyanverici həşəratlara qarşı mübarizə tədbirləri də aparılır.
Neftçala Dövlət Aqrar İnkişaf Mərkəzinin bitkiçilik sektorunun müdiri Elman Məmmədovla söhbət zamanı bildirdi ki, ötən il rayonda 9 min hektar sahədə yonca əkilib. Fermerlər yem bazasını möhkəmləndirmək üçün bu il sahələri bir az da artırıblar: “Yaxşı nəticə olduğu üçün bu il fermerlər 10 min hektar sahədə yonca bitkisinin əkinini həyata keçiriblər. Bizim mütəxəssislər daim fermerlərin yanındadırlar, onlara lazımi məsləhətlərini verirlər. Bunun nəticəsidir ki, yüksək məhsuldarlığa nail ola biliblər”.
Mütəxəssislərin fikrincə, məhsul yığımı belə davam edərsə, Neftçala gələcəkdə ixtisaslaşmış yemçilik və heyvandarlıq rayonlarından birinə çevrilə bilər.