2010-CU İLDƏ BAKIDA DÜNYA AZƏRBAYCANLI GƏNCLƏRİN BİRİNCİ KONQRESİ KEÇİRİLƏCƏKDİR
Bakı, 18 dekabr (AZƏRTAC). Dekabrın 18-də Diasporla İş üzrə Dövlət Komitəsinin sədri Nazim İbrahimov Yeni Azərbaycan Partiyasının mərkəzi qərargahında mətbuat konfransı keçirmişdir.
Azərbaycan diasporunun təşkilatlanma mərhələsini başa vurduğunu qeyd edən komitə sədri artıq dünya təcrübəsində tətbiq olunan müasir iş üslubu ilə fəaliyyət göstərdiklərini bildirmişdir. Diaspor təşkilatları dövlətimizin dəstəyini və Azərbaycan Respublikası Prezidentinin diqqət və qayğısını daim hiss edərək daha geniş və qətiyyətli fəaliyyətə başlamışlar. Azərbaycan diasporu artıq çox geniş təsir imkanlarına malikdir. Soydaşlarımız yaşadıqları ölkələrin ictimai-siyasi həyatında fəal iştirak edirlər. Diaspor təşkilatlarına yüksək siyasi hazırlığa malik şəxslər başçılıq edirlər. Onlar hər zaman bizim köməyimizdən asılı olmayaraq, Azərbaycanın maraqlarına uyğun hərəkət edirlər.
2009-cu ildə diaspor təşkilatları tərəfindən əsasən 20 Yanvar faciəsinin, Xocalı soyqırımının, 31 Mart - Azərbaycanlıların Soyqırımı Günü ilə əlaqədar tədbirlərin təşkil olunduğunu vurğulayan N.İbrahimov 2010-cu ildə də genişmiqyaslı tədbirlər həyata keçirəcəklərini qeyd etmişdir. Gənclərin fəaliyyətinin düzgün istiqamətləndirilməsinə xüsusi önəm verdiklərini bildirən komitə sədri, bu məqsədlə 2010-ci ildə Bakıda dünya azərbaycanlı gənclərin birinci konqresinin keçiriləcəyini bildirmiş və gələn il, həmçinin dünya azərbaycanlılarının növbəti qurultayının da təşkil olunacağını qeyd etmişdir.
Ötən ildə Xocalı soyqırımı ilə bağlı tədbirlər keçirən və dünya dövlətlərini bu faciəyə qiymət verməyə çağıran komitə, növbəti ildə də xarici ölkələrin parlamentlərində soyqırımın tanıdılması istiqamətində işlər həyata keçirəcəkdir. Bu məqsədlə komitə dünyanın aparıcı kitabxanalarında Xocalı faciəsi, eləcə də Azərbaycanın tarixi haqqında kitabların artırılmasına çalışacaqdır.
Dünya siyasətində dövlətimizə qarşı ikili standartların hələ də mövcud olduğunu və buna qarşı mübarizə apardıqlarını vurğulayan N.İbrahimov, regionun aparıcı dövləti olan Azərbaycana dünya siyasətində böyük maraq olduğunu qeyd etmişdir.
Bölmənin digər xəbərləri
