Georgi Mamulya: “Məşəli qoruyub saxlamaq” kitabı Azərbaycanın Cənubi Qafqazda əsas rolunu, vacib yerini göstərir VİDEO
Paris, 14 aprel, AZƏRTAC
Azərbaycan mühacirətinə dair kitabın hazırlanması ideyası Ramiz Abutalıbova məxsusdur. 2010-cu ildə Ramiz Abutalıbovla ilk görüşümüzdə o, mənə Azərbaycan mühacirət tarixi ilə çox maraqlandığını bildirdi. Birlikdə bu kitabı ərsəyə gətirdik.
Bu fikirləri Azərbaycan mühacirətinin siyasi tarixindən bəhs edən (1920-1940) “Məşəli qoruyub saxlamaq” adlı kitabın həmmüəllifi, tarix elmləri doktoru Georgi Mamulya həmin kitabın Parisdə Azərbaycan Mədəniyyət Mərkəzində səfirliyimiz tərəfindən təşkil olunmuş təqdimatından sonra AZƏRTAC-a müsahibəsində deyib.
Bildirib ki, kitabın fransız dilində nəşr edilməsi Ramiz Abutalıbovun böyük arzusu olub. Təəssüf ki, o, bunu görə bilmədi, ancaq kitabın nəşriyyat evində nəşrə hazırlandığını bilirdi. Kitab müxtəlif ölkələrin arxiv məlumatları əsasında ilk mənbədən hazırlanıb. Ancaq Əlimərdan bəy Topçubaşovun arxivi bu arxivlər arasında ən zənginidir. O, kitabda mühacirətdə olan Azərbaycan siyasi partiya və təşkilatlarının rəhbərlərinin 1920-1940-cı illərdə Azərbaycanın və Qafqazın müstəqilliyinin bərpasına maraq göstərmiş Avropa dövlətlərinin rəsmi və qeyri-rəsmi nümayəndələri ilə münasibətlərinin dərindən təhlil olunduğunu qeyd edib. İndiyə qədər istifadə olunmamış nadir arxiv sənədlərinə əsaslanan kitab bu illər ərzində Azərbaycanın siyasi mühacirət tarixinin ətraflı mənzərəsinin təqdim etdiyini diqqətə çatdırıb.
“Məşəli qoruyub saxlamaq” kitabında Azərbaycanın siyasi mühacirət tarixinin geniş mənzərəsini vermişik. Mühacirətin son dərəcə çətin şərtlərinə baxmayaraq, Qafqazın digər xalqlarının nümayəndələri ilə daim birgə fəaliyyət göstərməyi arzu etmiş Azərbaycanın siyasi partiya və təşkilatlarının nümayəndələri qafqazlıları bu gün də ruhlandıra biləcək əməkdaşlıq strukturları yaratmağa və inteqrasiyanı inkişaf etdirməyə nail olublar”, - deyə G.Mamulya vurğulayıb.
Diqqətə çatdırıb ki, bu kitab fransızlara Qafqazı, Azərbaycanı daha yaxından tanımağa imkan verəcək. Həmçinin fransızdilli oxucular bu kitab vasitəsilə Azərbaycanın Cənubi Qafqazda əsas rolu, vacib yerinin olması ilə tanış olacaqlar.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
