QAN YADDAŞI
20 YANVAR FACİƏSİ QURBANLARININ XATİRƏSİ UNUDULMAZDIR
Bakı, 10 yanvar (AZƏRTAC). 20 Yanvar faciəsinin iyirminci ildönümü ilə bağlı Binəqədi Rayon İcra Hakimiyyəti (RİH) tərəfindən tədbirlər planı hazırlanmışdır.
Faciənin ildönümü ərəfəsində bütün idarə, təşkilat və müəssisələrdə anma mərasimləri, konfranslar, “dəyirmi masa”lar, yığıncaq və mühazirələr təşkil ediləcək, Biləcəri qəsəbəsindəki “20 Yanvar” abidəsinin yerləşdiyi ərazidə təmizlik və abadlıq işləri aparılacaqdır.
20 Yanvar əlilləri və şəhid ailələri üzvləri ilə keçiriləcək görüşlərdə onlara maddi yardım göstəriləcək, yanvarın 19-da tədris müəssisələrində ilk dərs Qanlı Yanvar faciəsinə həsr ediləcəkdir. Həmin gün ictimaiyyət tərəfindən “20 Yanvar” abidəsi ziyarət olunacaqdır. Rayonun ərazisindəki məscidlərdə şəhidlərin xatirəsinə dualar oxunacaqdır.
Yanvarın 20-də rayon ictimaiyyəti Şəhidlər xiyabanını ziyarət edəcək, matəm əlaməti olaraq rayonun ərazisində dövlət bayraqları endiriləcək, saat 12.00-da şəhidlərin əziz xatirəsi bir dəqiqəlik sükutla yad ediləcəkdir.