İstanbul, 31 oktyabr, AZƏRTAC

BMT-nin Məskunlaşma Proqramı (UN-HABITAT) tərəfindən hər il fərqli şəhərlərdə qeyd olunan 31 Oktyabr - Ümumdünya Məskunlaşma Günü çərçivəsində İstanbulda beynəlxalq tədbir keçirilib.

AZƏRTAC xəbər verir ki, tədbir Türkiyə Prezidenti Administrasiyasının İctimaiyyətlə əlaqələr idarəsi, Ətraf Mühit, Şəhərsalma və İqlim Dəyişikliyi Nazirliyi və digər dövlət qurumlarının birgə təşkilatçılığı, eləcə də İstanbulun Üsküdar Bələdiyyəsinin ev sahibliyi ilə baş tutub.

Şəhərsalma hədəflərinin inkişafı və şəhərlərin əhəmiyyətinə diqqət çəkmək məqsədilə elan edilən Ümumdünya Məskunlaşma Günü bu il İstanbulda “Hər kəs üçün davamlı şəhərsalmanın gələcəyinin maliyyələşdirilməsi” mövzusunda təşkil olunub.

Tədbirdə Türkiyə Respublikasının Birinci xanımı Əminə Ərdoğan, dünyanın müxtəlif ölkələrindən dövlət rəsmiləri, mütəxəssislər və birinci xanımlar iştirak ediblər.

Ölkəmizi tədbirdə Azərbaycan Respublikası Dövlət Şəhərsalma və Arxitektura Komitəsinin sədri Anar Quliyev təmsil edib.

Üsküdar Bələdiyyəsinin sədri Hilmi Türkmen, Türkiyənin ətraf mühit, şəhərsalma və iqlim dəyişikliyi naziri Mehmet Özhaseki, Türkiyə Respublikasının Birinci xanımı və 2023-cü il Dünya Şəhərlər Gününün himayədarı Əminə Ərdoğan çıxışlarında dayanıqlı məskunlaşmanın əhəmiyyətinə toxunublar. Bildirilib ki, şəhərsalma və şəhərlərin inkişafı davamlı inkişafa nail olmaqda mühüm rol oynayır. Davamlı qlobal urbanizasiya tendensiyaları fonunda hər bir ölkənin üzləşdiyi spesifik çağırış və imkanlar inkişaf proqramlarının əhəmiyyətini daha da artırır.

Qeyd edilib ki, Əminə xanım Ərdoğanın başçılığı ilə Türkiyədə başladılan “Sıfır tullantı” layihəsi çərçivəsində indiyədək tullantıların yenidən emalından əldə edilən gəlir 4 milyard ABŞ dolları təşkil edib. Tullantı kağızların yenidən emalı ilə kəsilməsinin qarşısı alınan ağac sayı isə 432 milyona yüksəlib.

Sonra BMT-nin Məskunlaşma Proqramının icraçı direktoru xanım Maimuna Mohd Şərif salamlama nitqi ilə çıxış edərək, BMT-nin Baş katibi Antonio Quterreşin müraciətini iştirakçıların diqqətinə çatdırıb.

Tədbir digər məruzəçilərin, o cümlədən Azərbaycan Respublikası Dövlət Şəhərsalma və Arxitektura Komitəsinin sədri Anar Quliyevin çıxışı ilə davam edib.

Xatırladaq ki, bu il oktyabrın 2-də Bakı BMT-nin Məskunlaşma Proqramı (UN-HABITAT) və Azərbaycan Respublikasının Dövlət Şəhərsalma və Arxitektura Komitəsinin əməkdaşlığı ilə “Şəhərsalma Həftəsi - 2023” çərçivəsində ilk dəfə Ümumdünya Məskunlaşma Gününə ev sahibliyi edib.

BMT-nin 1985-ci ildə qəbul edilmiş müvafiq qərarına əsasən, Ümumdünya Məskunlaşma Günü hər il bir ölkədə qeyd olunmaqla, hamı üçün əlçatan və keyfiyyətli şəhər həyatını təşviq edir, dayanıqlı şəhərlərin inkişafı üzrə çağırışların müzakirəsində qlobal platforma rolunu oynayır.