SAF 2023 - Beynəlxalq STEAM Azərbaycan Festivalının açılış mərasimi keçirilib VİDEO
Bakı, 4 dekabr, AZƏRTAC
Dekabrın 4-də Elm və Təhsil Nazirliyinin dəstəyi ilə Bakı Ekspo Mərkəzində SAF 2023 - Beynəlxalq STEAM Azərbaycan Festivalının açılış mərasimi keçirilib.
AZƏRTAC xəbər verir ki, açılış mərasimində çıxış edən elm və təhsil naziri Emin Əmrullayev üçüncü ildir keçirilən festivalın təhsil sahəsində mühüm tədbir olduğunu diqqətə çatdırıb. Nazir bildirib ki, 2025-ci ildə yeni yazılacaq elm və təhsil standartlarında STEAM-in bəzi elementlərinin milli kurikulumun hissəsinə çevrilməsi nəzərdə tutulur. Yeni standartlarda 3D robototexnikasının bəzi elementləri texnologiya fənninin məzmununa daxil olunacaq. Nazir vurğulayıb ki, qarşıda duran məqsəd gələcək nəslin ənənəvi olaraq humanitar və ya texniki yönlərə bölünməklə yox, hərtərəfli inkişafını təmin etməkdir.
Emin Əmrullayev çıxışının sonunda festivalın təşkilində əməyi olan hər kəsə təşəkkür edib, iştirakçılara uğurlar arzulayıb.
Daha sonra çıxış edən “STEAM Azərbaycan” layihəsinin rəhbəri İqrar Nəzərov layihə və festival barədə ətraflı məlumat verib. İqrar Nəzərov STEAM-in hazırda ölkə üzrə 396 məktəb və 150 mindən çox şagirdi əhatə etdiyini, 25 STEAM Mərkəzinin fəaliyyət göstərdiyini bildirib. Vurğulanıb ki, layihə üzrə şagird sayının 2026-cı ilə kimi 280 minə çatdırılması nəzərdə tutulur.
İqrar Nəzərov festivalın final mərhələsində 11 ölkənin komandalarının yarışdığını bildirib. Əlavə edib ki, final mərhələsində ümumilikdə 868 yerli, 159 xarici iştirakçı yarışır. SAF 2023-də müxtəlif yarış kateqoriyaları üzrə iştirak edən 96 nəfərlik münsiflər heyətində Azərbaycan, Türkiyə, Böyük Britaniya, Norveç, Slovakiya, Bolqarıstan, Danimarka, Çexiya kimi ölkələrdən nümayəndələr yer alıb.
Bildirilib ki, beynəlxalq səviyyədə təşkil olunan SAF 2023 ümumilikdə 14 yarış və 1 innovativ layihələr sərgisi formatında keçirilir.
Festival dekabrın 8-dək davam edəcək.
Qeyd edək ki, SAF 2023-ün keçirilməsində məqsəd STEAM əsaslı tədrisin təşviqi, şagirdlər arasında XXI əsr bacarıqlarının inkişaf etdirilməsi, yaradıcı, rəqəmsal texnologiya biliciləri olan təhsilalanların müəyyənləşdirilməsi, innovasiyalar və rəqəmsallaşma üzrə beynəlxalq təcrübənin öyrənilməsidir.
SAF 2023 “Robokids”, “Engineers of Future” (Gələcəyin mühəndisləri), “First LEGO League Explore”, “VidX”, “First LEGO League Challenge”, “VEX Robotix Competition” - “VEX Robototexnika müsabiqəsi”, “Innovativ Exhibition” (İnnovativ sərgi), “Deep Dive” (Sualtı dronlar/gəmi), “Hackathon”, “VEX IQ Competition” (VEX IQ Yarışması), “Mechatronics” (Mexatronika), “Wings and Wheels” (Qanadlar və təkərlər), “FlyTech”, “Boat Racing” (Gəmi yarışması), “H2 Grand Prix PRO” adlı ümumilikdə 14 yarış, 15 yaş kateqoriyası üzrə, həmçinin 1 kateqoriya üzrə innovativ layihələr sərgisi formatında keçirilir.
Bölmənin digər xəbərləri
