Vaşinqton, 22 may, AZƏRTAC

“Azərbaycan Orta Dəhlizlə bağlı bütün məsələlərin mərkəzindədir. Prezident İlham Əliyevin də qeyd etdiyi kimi, bizim bölgədə keçirilən bütün layihələr Azərbaycanın birbaşa iştirakı ilə, Azərbaycanın onun mərkəzində olması ilə və ölkəmizin liderliyi ilə keçirilir”.

Bu sözləri Azərbaycanın ABŞ-dakı səfiri Xəzər İbrahim AZƏRTAC-a açıqlamasında deyib.

Vaşinqtonda keçirilən 8-ci Trans-Xəzər Forumunda iştirak edən səfir bildirib ki, Azərbaycanın sərmayəsi ilə Bakı-Tbilisi-Qars dəmiryolunun genişləndirilməsi, Ələt limanının həcminin artırılması gerçəkləşdirilib.

“Həm amerikalı rəsmilər, həm də bölgədən olan səfirlər Azərbaycanın xüsusi rolunu qeyd edirlər. Xüsusilə, Özbəkistan səfiri Azərbaycanın ölkəsi üçün nə qədər vacib olduğunu, onun dünyaya çıxışı üçün necə imkanlar yaratdığını qeyd edib. Orta Dəhliz region ölkələrini birləşdirir, Çindən Avropaya ən yaxın, ən ucuz və ən sabit yol və imkanlar yaradır”.

Həmçinin səfir Azərbaycanın Orta dəhlizlə bağlı çoxtərəfli və ikitərəfli formatda iş apardığını bildirib. Onun sözlərinə görə, çoxtərəfli formatda Azərbaycan Türk Dövlətləri Təşkilatı ilə işləyir, gömrük xərcləri, əsasnamələr müəyyən edilir. Səfir qeyd edib ki, Orta Dəhliz tarixi İpək yolunun bir hissəsidir: “İpək yolu tək məhsullar deyil, texnologiyalar, mədəniyyətlər, insanlararası əlaqələrlə də bağlı idi. Biz də Orta Dəhlizə təkcə məhsulların daşınması perspektivindən baxmamalıyıq. Azərbaycan Xəzər-Avropa İttifaqı, Yaşıl Enerji Dəhlizi təklifi ilə çıxış edir. Bu təklif ABŞ və Aİ tərəfindən müsbət qarşılanır. Bu da təbii ki, Orta Dəhlizdir, lakin Xəzər dənizinin bərpaolunan enerji potensialı ilə bağlıdır. Bu dəhlizlə biz Xəzər dənizinin külək enerjisindən istifadə edərək elektriki Avropa ölkələrinə ixrac edə bilərik. Azərbaycan bu istiqamətdə artıq Gürcüstan, Rumıniya və Macarıstanla anlaşma memorandumu imzalayıb”.