® Avropa komissarı 12-ci Beynəlxalq “Caspian Energy Forum”un iştirakçılarına müraciət edib VİDEO
Avropa İttifaqının (Aİ) Qonşuluq və Genişlənmə üzrə Komissarı Oliver Varhelyi 12-ci Beynəlxalq “Caspian Energy Forum”un iştirakçılarına videomüraciət edib.
Müraciətdə sözügedən tədbirin təkcə Cənubi Qafqaz üçün deyil, həm də Avropa və Mərkəzi Asiya üçün böyük əhəmiyyət kəsb edən bir sıra mövzuların müzakirəsi üçün mühüm platforma rolunu oynadığı bildirilib.
“Nəqliyyat və enerji şəbəkələrimizin birləşdirilməsi daha dayanıqlı və sabit iqtisadiyyatların formalaşmasına, eləcə də regionlarımız arasında daha sıx əlaqələrin qurulmasına töhfə verə bilər”, - deyə Oliver Varhelyi nəqliyyat və enerji əlaqəsi məsələlərini şərh edərkən qeyd edib.
Onun sözlərinə görə, Trans-Xəzər dəhlizinin mərkəzində yerləşən Cənubi Qafqaz Qara və Xəzər dənizləri arasında fasiləsiz rabitənin təmin edilməsində strateji rol oynayır.
“Son illərdə Trans-Xəzər dəhlizi Mərkəzi Asiyadan Avropaya malların çatdırılması üçün mühüm ticarət marşrutuna çevrilib. Son layihələr onu göstərir ki, dəhliz boyunca ticarətin həcmi 2030-cu ilə qədər üç dəfə arta bilər”, - deyə Oliver Varhelyi bildirib.
Avropa komissarı öz çıxışında səyahət və tranzit vaxtını azaltmaq üçün Qara və Xəzər dənizləri arasında əsas kommunikasiya marşrutlarının və nəqliyyat əlaqələrinin təkmilləşdirilməsini təklif edib.
“Avropa İttifaqı ilə inteqrasiya olunmuş multimodal və rəqəmsal nəqliyyat şəbəkəsini inkişaf etdirməyə də davam etmək lazımdır. Şərq tərəfdaşlığı üzrə investisiya və iqtisadi planımız Trans-Avropa Nəqliyyat Şəbəkəsinin (TEN-T) və Qara dəniz xətti üzrə əsas flaqman layihələrinin tamamlanması üçün mühüm alət olaraq qalacaq. Bu layihələr bərə xidmətinin yaradılmasına və rəqəmsal rabitənin dəstəklənməsinə yönəlib”, - Oliver Varhelyi əlavə edib. O, həmçinin Xəzər regionundan, xüsusən də Azərbaycandan Aİ-yə təbii qaz tədarükünün həmişəkindən daha vacib olduğunu bildirib. Oliver Varhelyinin sözlərinə görə, bu tədarük Rusiya tədarükünün əsas alternativ mənbəyinə çevrilib və Cənub Qaz Dəhlizinin gücü artdıqca miqyası da arta bilər.
Avropa komissarının sözlərinə görə, Xəzər regionu, həmçinin karbonsuzlaşdırmağa və yeni iş yerlərinin, təmiz infrastrukturun və daha dayanıqlı gələcəyin yaradılmasına töhfə verə bilən bərpaolunan enerjidən istifadə etmək potensialına malikdir. “Biz sizi bu potensialdan tam istifadə etməyə dəvət edirik. Aİ “nou-hau”, texnoloji təcrübə və maliyyə dəstəyi, eləcə də daha təmiz enerjiyə ehtiyacı olan çox böyük bazar təklif edə bilər”, - Olivier Varhelyi qeyd edib ki, Aİ-nin əsas flaqman layihələrindən biri olan Qara Dəniz Elektrik Kabeli layihəsi İqtisadi və İnvestisiya Planı çərçivəsində təmiz enerji ticarəti üçün şərait yaratmağı hədəfləyir: “COP29-un Bakıda təşkili barədə qərar qəbul edildikdən sonra bərpaolunan enerji mənbələrindən, xüsusən də külək enerjisindən istifadənin intensivləşdirilməsi daha da vacib olub. COP29 mühüm fürsət pəncərəsidir və mənim sizə mesajım şəffaf və aydındır. Aİ konfrans ərəfəsində bərpaolunan enerji mənbələri və yaşıl kommunikasiya sistemlərinin tətbiqini sürətləndirmək üçün sizinlə işləməyə hazırdır”.
“Caspian Energy Club” dünyanın 50 ölkəsindən 5000-dən çox şirkəti birləşdirən dinamik və inkişaf edən regional təşkilatdır. Biznes-hökumət dialoqunun fəal iştirakçısı olan “Caspian Energy Club”ın əsas məqsədi Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir. Biznes-networking üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir.
Mənzil-qərargahı Bakıda yerləşən “Caspian Energy Club”ın əsas fəaliyyəti Mərkəzi Dəhliz ölkələrini əhatə edir. Klubun, həmçinin Almaniya, BƏƏ, Böyük Britaniya, Çexiya, Estoniya, Finlandiya, Gürcüstan, Qazaxıstan, Qırğızıstan, Latviya, Özbəkistan, Polşa, Türkiyədə rəsmi nümayəndəlikləri, habelə dünyanın müxtəlif ölkələrində səlahiyyətli nümayəndələri var.
“Caspian Energy Club International” 2023-cü ildə “Caspian Energy Club”ın beynəlxalq layihələrini idarə etmək məqsədi ilə yaradılıb. 5 il ərzində “Caspian Energy Club International” dünyanın 100 ölkəsində klubun fiziki ofislərini açmağı planlaşdırır. “Caspian Energy Club International”ın əsas öhdəliklərindən biri nümayəndələrin təyin olunmadığı ölkələrdə klubun fəaliyyətini idarə etmək, eləcə də bütün xarici nümayəndəliklər üçün ümumi strategiyanın formalaşdırılmasıdır.
Bölmənin digər xəbərləri
