Zaqatalanın ucqar Cimcimax kəndi sürətli internetlə təmin edilib VİDEO
Zaqatala, 26 oktyabr, AZƏRTAC
Zaqatalanın çətin relyefli və dağlıq ərazidə yerləşən Cimcimax kəndi sürətli və kəsintisiz internet xidməti ilə təmin olunub.
AZƏRTAC xəbər verir ki, “Aztelekom” MMC “Onlayn Azərbaycan” layihəsi çərçivəsində telekommunikasiya infrastrukturunun yenilənməsi və müasir beynəlxalq standartlara uyğunlaşdırılması istiqamətində işləri davam etdirir. Növbəti mərhələdə Zaqatala rayonunun çətin relyefli və dağlıq ərazidə yerləşən Cimcimax kəndi sürətli və kəsintisiz internet xidməti ilə təmin edilib. Hazırda kənd ərazisində 37 telefon və 30 genişzolaqlı internet istifadəçisi var.
Ötən gün əməkdaşımız bu ucqar kənddə olub, sakinlərlə görüşüb. Onun qeydlərini təqdim edirik.
Ölkəmizin ucqar yaşayış məntəqələrindən olan Cimcimax kəndinə rayon mərkəzindən olan məsafə 40 kilometrə yaxındır. Çay kənarı ilə uzanan yollarla hərəkət edirik, nəhayət kəndə çatırıq. Dörd tərəfi dağlarla əhatələnən, ərazisindən üç dərə çayı axan Cimcimax kəndinin girişi görünür. Bu dağ kəndində ağaclar o qədər sıx və ucadır ki, evləri müşahidə etmək mümkün deyil. Gərək addım-addım dağlara tərəf yürüyəsən.
Bizi və “Aztelekom” əməkdaşlarını kəndin girişində sakinlər qarşılayırlar. Mart ayında kəndə gəlişimiz zamanı sakinlər internetlə bağlı problemlərindən bəhs etmişdilər. Elə ilk sualımız da bu olur: “İnternet xəttiniz çəkildimi, istifadə edə bilirsinizmi?”. İnsanların üzü gülür.
Kənd sakini Fikrət Əliyev bildirir ki, artıq bir aydır Cimcimaxdan ölkəmizin, eləcə də dünyanın istənilən nöqtəsində yaşayan qohum-əqrəba, dost-tanışla virtual əlaqə yarada bilirlər. Onun sözlərinə, görə əvvəllər kənd bir ədəd radio telefonla əhatə olunubmuş: “Sonralar 32 ailə üçün stansiya quraşdırıldı. Amma kəndimizdə heç bir mobil operator işləmirdi. Bu da müəyyən çətinliyə səbəb olurdu. Çətinliklərin belə tezliklə aradan qaldırılacağına, sözün düzü, inanmırdıq. Çox çətinliklə də olsa, kəndimizdə internet əlaqəsi yarandı. Baxın, (qarşıdakı dağın zirvəsini göstərir – red.) o zirvənin yüksəkliyi 1500 metrdən də çoxdur. Stansiya həmin yüksəklikdə quraşdırılıb”.
Digər sakinlərlə də söhbət edirik. Məlum olur ki, indi onlar günün istənilən saatında istər rayondakı qohum-əqrəba, istərsə də xaricdə yaşayan yaxınları ilə virtual bağlantı yarada bilirlər.
“Aztelekom”un Şimal-Qərb regional filialının Zaqatala şöbəsinin müdiri Namiq Şıxıyevin sözlərinə görə, dörd tərəfi dağlarla əhatə olunan Cimcimaxda hava xətti ilə siqnalların alınması üçün iki həftəyə yaxın ətraf dağların hər birinin zirvəsini gəzib, araşdırma aparıblar. Nəhayət, kəndin şərq hissəsində 1500 metr yüksəklikdəki zirvədə həmin siqnal alınıb və orada stansiya quraşdırılıb.
“Əvvəllər kəndə peyk avadanlıqları vasitəsilə xidmət göstərilirdi ki, bu da hava şəraiti kəskin dəyişəndə müəyyən çətinliklər yaradırdı. “Aztelekom” MMC tərəfindən Cimcimax kəndində müasir tipli RKL avadanlıqları quraşdırılaraq, əhaliyə genişzolaqlı internet xidmətlərinin verilməsi və dayanıqlı rabitə xidmətlərinin göstərilməsi təmin olundu”, - deyən şöbə müdiri onu da diqqətə çatdırır ki, siqnallar alındıqdan sonra dəmir dirəklər basdırılıb və kabellər çəkilib. Namiq Şıxıyev əlavə edir ki, internet xətti çəkiləndə bir sıra çətinliklərlə qarşılaşsalar da, nə bir ağac kəsilib, nə də təbiətə zərər vurulub. Bu işdə “Aztelekom”un əməkdaşlarına kənd sakinləri də yaxından köməklik göstəriblər. Beləcə işlər planlandığından xeyli əvvəl başa çatdırılıb.
Onu da bildirək ki, Rəqəmsal İnkişaf və Nəqliyyat Nazirliyinin həyata keçirdiyi “Onlayn Azərbaycan” layihəsi çərçivəsində ölkənin digər bölgələrində də yüksəksürətli internetin təmin edilməsi üçün müvafiq işlər planlı şəkildə aparılır.
“Aztelekom” MMC-dən AZƏRTAC-a verilən məlumata görə, bu ilin 9 ayı ərzində Azərbaycanda 1 milyondan çox ev təsərrüfatı və biznes subyektinin genişzolaqlı internetə çıxış imkanı yaradılıb. Ümumilikdə, ölkədə 2,9 milyon təsərrüfatın genişzolaqlı internetə çıxışı təmin olunub. Layihə müddətində ölkədə genişzolaqlı internetə çıxış imkanı əldə etmiş ev təsərrüfatı və biznes subyektlərinin sayı artaraq 99,1 faizə yüksəlib.
Vətəndaşlar xidmətlərə qoşulmaq üçün “Aztelekom”un “170” Çağrı mərkəzinə zəng edə, ərazi üzrə xidmət göstərən şöbəyə həmçinin qurumun rəsmi saytı vasitəsilə müraciət edə bilərlər.
Bölmənin digər xəbərləri
