Şanxay, 6 noyabr, AZƏRTAC

“Azərbaycanın BMT-nin İqlim Dəyişmələri üzrə Çərçivə Konvensiyasının (UNFCCC) Tərəflər Konfransının 29-cu sessiyasına (COP29) ev sahibliyi etməsi tarixi hadisədir. Azərbaycan ev sahibi kimi iqlim məsələlərində konstruktiv rol oynayır. İnanırıq ki, Azərbaycan bu tədbiri uğurla keçirəcək. Çin COP29-da yüksək səviyyədə nümayəndə heyəti ilə təmsil olunacaq”.

AZƏRTAC xəbər verir ki, bu sözləri Çinin kommersiya nazirinin müavini, Azərbaycan-Çin Hökumətlərarası Ticarət-İqtisadi Əməkdaşlıq Komissiyasının həmsədri Lin Ci Azərbaycanın Baş nazirinin müavini, komissiyanın Azərbaycan tərəfdən həmsədri Şahin Mustafayev ilə Şanxayda keçirilən görüşdə deyib.

Görüşdə iki ölkə arasında iqtisadi-ticari əməkdaşlığın cari vəziyyəti və inkişaf perspektivləri müzakirə olunub.

Baş nazirinin müavini Şahin Mustafayev cari ilin iyulunda Astanada dövlət başçıları İlham Əliyev və Si Cinpinin görüşü zamanı iki ölkə əlaqələrinin strateji tərəfdaşlıq səviyyəsinə yüksəldilməsi barədə Birgə Bəyannamənin qəbul edilməsinin Azərbaycan-Çin münasibətlərini daha da möhkəmləndirdiyini, əməkdaşlığımızın yeni mərhələyə qədəm qoyduğunu bildirib. O, hazırda ölkələrimizin iqtisadiyyatın müxtəlif istiqamətlərində, o cümlədən enerji, nəqliyyat, investisiya, turizm, kənd təsərrüfatı, yaşıl enerji sahələrində sıx əməkdaşlıq etdiyini, cari ilin 9 ayında ikitərəfli ticarət dövriyyəsinin 16 faiz çoxalaraq 2,65 milyard ABŞ dollarına çatdığını diqqətə çatdırıb. Bildirib ki, Çin şirkətləri Azərbaycanda sənaye, kənd təsərrüfatı, ticarət, xidmət sektoru, inşaat, nəqliyyat, informasiya-kommunikasiya texnologiyaları və digər sahələrdə uğurla fəaliyyət göstərir.

Azərbaycan və Çin arasında iqtisadi əlaqələrin dinamikasına təsir edən mühüm amillərdən birinin enerji sahəsində səmərəli əməkdaşlıq olduğunu vurğulayan Ş.Mustafayev bildirib ki, hazırda alternativ və bərpaolunan enerji mənbələri sahəsi ölkələrimiz arasında əməkdaşlığın perspektivli sahələrindən biridir. Azərbaycan zəngin neft-qaz ehtiyatlarına malik olmasına baxmayaraq, yaşıl inkişafı və yaşıl enerjini prioritet elan edib, bu sahədə qabaqcıl texnologiya və təcrübəyə malik Çin ilə əməkdaşlığa əhəmiyyət verir. Azərbaycanın yaşıl enerji imkanlarının inkişafı məqsədilə bir sıra Çin şirkətləri ilə potensial layihələr müzakirə olunur. COP29 dövründə qonaqlara Çin istehsalı olan elektrik mühərrikli avtomobil və avtobuslar xidmət göstərəcək. Bu xüsusda əməkdaşlıq çərçivəsində həmçinin 2025-ci ildə yerli istehsalın yaradılması, ehtiyat hissələrinin lokallaşdırılması da nəzərdə tutulub. Azərbaycanın lokomotivliyi ilə həyata keçirilən yaşıl enerji dəhlizlərində Çin şirkətlərinin iştirakı arzuolunandır.

Baş nazirin müavini ölkələrimizin nəqliyyat-tranzit sahəsində əməkdaşlığından danışaraq, Trans-Xəzər Beynəlxalq Nəqliyyat Dəhlizinin – Orta Dəhlizin Çin ilə Avropa arasında yükdaşımalarda artan əhəmiyyətini vurğulayıb. O qeyd edib ki, bu ilin 9 ayında Azərbaycan ərazisindən Çin mallarının tranzit daşınmasının həcmi 74 faiz artıb.

Çinin kommersiya nazirinin müavini Lin Ci iki ölkə arasında münasibətlərin strateji tərəfdaşlıq səviyyəsinə yüksəlməsinin tarixi hadisə olduğunu vurğulayaraq, dövlət başçılarının qəbul etdiyi Birgə Bəyannamənin ölkələrimizin münasibətlərinin daha da genişləndirilməsi üçün zəmin yaratdığını deyib. O, ötən ilin noyabrında Azərbaycan-Çin Hökumətlərarası Ticarət-İqtisadi Əməkdaşlıq Komissiyasının Şanxayda keçirilmiş 9-cu iclasından keçən dövrdə iqtisadiyyatın müxtəlif sahələrində əməkdaşlıqda irəliləyişin müşahidə olunduğunu bildirib.

Nazir müavini Lin Ci Azərbaycan-Çin iqtisadi-ticari əməkdaşlığının geniş müstəvini əhatə etdiyini, investisiya, yaşıl enerji kimi sahələrdə əhəmiyyətli nəticələrin əldə edildiyini diqqətə çatdırıb. O, Bakıda keçiriləcək COP29 tədbirində Çin istehsalı olan elektrik avtomobilləri və avtobuslarının istifadə olunmasını yüksək qiymətləndirib, Çin nümayəndə heyətinin tərkibində qlobal iqlim konfransı üçün Bakıya səfərini səbirsizliklə gözlədiyini deyib.

Lin Ci Orta Dəhlizin təkcə nəqliyyat dəhlizi olmadığını, marşrut boyunca iqtisadi-ticari əməkdaşlığın dərinləşməsinə təkan verdiyini deyib.

Görüşdə müxtəlif sahələr üzrə əməkdaşlığın irəli aparılmasına dair fikir mübadiləsi aparılıb, müvafiq sahələrdə sənədlərin imzalanma üçün hazırlanması, işçi qruplarının yaradılması və Hökumətlərarası Komissiyanın növbəti iclasının gələn il Bakıda keçirilməsi barədə razılıq əldə olunub.

Şahin Cəfərov

AZƏRTAC-ın xüsusi müxbiri

Şanxay