Adil Məmmədov: Azərbaycanın beynəlxalq tədbirlərə ev sahibliyi üzrə uğurlar siyahısına yeni nailiyyət əlavə ediləcək VİDEO
Bakı, 17 noyabr, AZƏRTAC
Bakı Alov Qüllələri binaları şəhərin müasir və dinamik inkişafını, Qız qalası isə Azərbaycanın zəngin və qədim tarixini simvolizə edir. Bu iki rəmz Ümumdünya Şəhərsalma Forumunun (WUF13) loqosunda öz əksini tapır və loqonun rəngləri ənənəvi Azərbaycan şəbəkə sənətindən ilhamlanır.
AZƏRTAC xəbər verir ki, bu barədə Azərbaycan Əməliyyat Şirkətinin rəhbəri Adil Məmmədov gələn il Bakıda keçiriləcək BMT-nin Ümumdünya Şəhərsalma Forumunun 13-cü sessiyası (WUF13) ilə bağlı diplomatik korpus üçün təşkil olunan məlumat sessiyasında deyib. O bildirib ki, WUF13-ə 200 gündən az qalmasına baxmayaraq, hazırlıqlar intensiv şəkildə davam edir: “Diplomatik korpusun dəstəyi sayəsində biz əminik ki, Forum Azərbaycanın böyük beynəlxalq tədbirlərə ev sahibliyi üzrə uğurlar siyahısına yeni bir mühüm nailiyyət əlavə edəcək. Son on ildə ölkəmizdə keçirilən tədbirlər yüksək bacarıqlı gənclərdən ibarət peşəkar kadr potensialının formalaşmasına səbəb olub. Hazırda Əməliyyat Şirkətində 180-ə yaxın mütəxəssis çalışır və onların yarısı qadınlardır ki, bu da gender bərabərliyinə sadiqliyimizin göstəricisidir. Komandanın yerləşdiyi Bakı Ağ Şəhər keçmiş sənaye zonası olan Qara Şəhərin müasir şəhərsalma nümunəsinə çevrilmiş hissəsidir və bu transformasiya paytaxtın davamlı inkişaf yolunu simvolizə edir”.
A.Məmmədov bildirib ki, Forum çərçivəsində könüllülük proqramı da xüsusi yer tutur. 5 Dekabr – Beynəlxalq Könüllülər Günü – WUF13 Könüllülər Mərkəzinin açılışı planlaşdırılır və tədbirdə təxminən 2500 könüllünün iştirak edəcəyi gözlənilir. Davamlılıq, inklüzivlik və ekoloji təhlükəsizlik hazırlıq prosesinin əsas prinsipləridir. UN-Habitat ilə əməkdaşlıq çərçivəsində ISO 2021 davamlı tədbir idarəçiliyi sertifikatının alınması üzrə işlər başlayıb. Emissiyasız nəqliyyat strategiyası, əlçatan marşrutlar, ictimai nəqliyyat inteqrasiyası və xüsusi ehtiyaclı şəxslər üçün uyğun hotellərin siyahısı hazırlanır. Təhlükəsizlik məsələləri də prioritetdir. Fövqəladə hallar, yanğın təhlükəsizliyi, tibbi təminat və kütlə idarəetməsi üzrə planlar milli qurumlar və BMT agentlikləri ilə birlikdə tamamlanır.
Forumun əsas məkanı Bakı Olimpiya Stadionu olacaq. Burada 90 000 kvadratmetrlik müvəqqəti konstruksiyaların, o cümlədən 35 000 kvadratmetr Expo zonanın qurulması nəzərdə tutulur və iştirakçı dövlətlər sərgi sahələrini rezerv etməyə dəvət olunur.
WUF13-in kommunikasiya platformaları artıq əsas sosial şəbəkələrdə fəaliyyətə başlayıb və UN-Habitat ilə daimi koordinasiya aparılır.
Bölmənin digər xəbərləri
