Nazir müavini: Yeni dövlət proqramı Azərbaycanın ərzaq təhlükəsizliyini daha da gücləndirəcək VİDEO
Bakı, 4 iyun, AZƏRTAC
Azərbaycanda ərzaq təhlükəsizliyinin təmin olunması, aqrar istehsalın dayanıqlılığının artırılması və kənd ərazilərinin sosial-iqtisadi inkişafının sürətləndirilməsi məqsədilə yeni dövlət proqramı hazırlanır.
AZƏRTAC xəbər verir ki, bu barədə kənd təsərrüfatı nazirinin müavini Zaur Əliyev “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026−2030-cu illər üçün Dövlət Proqramı”ndan irəli gələn məsələlərə həsr olunmuş mətbuat konfransında çıxışı zamanı bildirib.
Onun sözlərinə görə, proqramın əsas məqsədləri kənd təsərrüfatı istehsalının artırılması, heyvandarlıq və bitkiçilik sahələrinin inkişaf etdirilməsi, logistika və saxlama infrastrukturunun genişləndirilməsi, kənd yerlərində məşğulluq imkanlarının artırılması, həmçinin əhalinin keyfiyyətli ərzaq məhsulları ilə təminatının gücləndirilməsidir. Nazir müavini qeyd edib ki, proqramın hazırlanmasını vacib edən əsas amillər sırasında dünyada baş verən qlobal dəyişikliklər və yeni çağırışlar dayanır.
“Dünya əhalisinin artması ilə qida məhsullarına tələbat yüksəlir. Eyni zamanda, iqlim dəyişiklikləri kənd təsərrüfatına ciddi təsir göstərir. Son illərdə beynəlxalq bazarlarda müşahidə olunan qeyri-sabitlik və təchizat zəncirlərində yaranan problemlər bir çox ölkələr kimi, Azərbaycanın da ərzaq təhlükəsizliyi məsələlərinə xüsusi diqqət yetirməsini zəruri edir. Son on ildə ölkənin aqrar sektorunda mühüm inkişaf göstəriciləri əldə olunub. Bu dövrdə kənd təsərrüfatı məhsullarının istehsalı real ifadədə 37,8 faiz artıb. Bitkiçilik sahəsində artım 48,2 faiz, heyvandarlıq sahəsində isə 29,6 faiz təşkil edib. Aqrar və emal məhsullarının ixracı da 62,8 faiz yüksəlib”, – deyə Zaur Əliyev vurğulayıb.
Zaur Əliyevin sözlərinə görə, aqrar sahənin inkişafı üçün hüquqi və institusional baza gücləndirilib, müasir infrastruktur yaradılıb, soyuducu anbarların və elevatorların tutumu artırılıb, laboratoriya xidmətlərinin imkanları genişləndirilib, fermerlərin texnika və avadanlıqlara çıxışı yaxşılaşdırılıb: “Bu günədək 96 mindən çox kənd təsərrüfatı texnikası güzəştli lizinq mexanizmi vasitəsilə fermerlərin istifadəsinə verilib. Eyni zamanda, Elektron Kənd Təsərrüfatı İnformasiya Sistemi yaradılıb və subsidiyaların verilməsi prosesi tam rəqəmsallaşdırılıb”.
Nazir müavini aqrar sığorta mexanizminin tətbiqini də mühüm nailiyyətlərdən biri kimi qiymətləndirib. O bildirib ki, dövlət dəstəyi ilə formalaşdırılan aqrar sığorta sistemi fermerlərin risklərdən qorunmasına və kənd təsərrüfatında dayanıqlılığın artırılmasına mühüm töhfə verir.
Zaur Əliyev vurğulayıb ki, yeni Dövlət Proqramı mövcud nailiyyətlərin davam etdirilməsinə, aqrar sektorun rəqabət qabiliyyətinin yüksəldilməsinə və Azərbaycanın ərzaq təhlükəsizliyinin daha da möhkəmləndirilməsinə xidmət edəcək.
Bölmənin digər xəbərləri
