Buxarestdə Heydər Əliyev Fondunun dəstəyi ilə “Cənubi Qafqazın geosiyasəti və enerji strategiyaları - Azərbaycan diqqət mərkəzində” mövzusunda konfrans keçirilmişdir VİDEO
Bakı, 18 mart (AZƏRTAC). Heydər Əliyev Fondunun dəstəyi ilə Buxarestdə “Cənubi Qafqazın geosiyasəti və enerji strategiyaları - Azərbaycan diqqət mərkəzində” mövzusunda konfrans keçirilmişdir.
AZƏRTAC xəbər verir ki, konfransda Azərbaycan parlamentinin deputatları, Rumıniya ziyalıları, yazıçılar, siyasi analitiklər, Buxarestdə fəaliyyət göstərən araşdırma institutlarının rəhbərləri, Rumıniya Prezidenti Administrasiyasının milli təhlükəsizlik departamentinin, İqtisadiyyat Nazirliyinin, Azərbaycan səfirliyinin əməkdaşları, Müdafiə İnstitutunun rəhbərliyi, Azərbaycan-Rumıniya Gənclər və Mədəniyyət Assosiasiyasının üzvləri iştirak etmişlər.
Heydər Əliyev Fondunun Rumıniya nümayəndəliyinin direktoru İqbal Hacıyev konfransda çıxış edərək, Cənubi Qafqazın dünyanın intensiv geosiyasi proseslərin cərəyan etdiyi regionlarından biri olduğunu söyləmişdir.
Ermənistan-Azərbaycan, Dağlıq Qarabağ münaqişəsindən danışan İ.Hacıyev problemin regionun inkişafı üçün əngəl yaratdığını bildirmişdir. Qeyd etmişdir ki, heç bir gələcək strategiyası olmayan, iqtisadi baxımdan tənəzzülə uğrayan Ermənistanın rəhbərliyi sifarişli siyasət yürüdür.
İ.Hacıyev bildirmişdir ki, əsası ümummilli lider Heydər Əliyev tərəfindən qoyulmuş və hazırda Prezident İlham Əliyevin uğurla davam etdirdiyi siyasət sayəsində Azərbaycan beynəlxalq miqyasda böyük nüfuz qazanmış, Cənubi Qafqazın lider dövlətinə çevrilmişdir.
Milli Məclisin deputatı, Rumıniya ilə parlamentlərarası əlaqələr üzrə dostluq qrupunun rəhbəri Azay Quliyev Cənubi Qafqazın geosiyasi vəziyyəti haqqında danışmış, bu həssas regionun dünyanın diqqət mərkəzində olduğunu bildirmişdir.
Qeyd edilmişdir ki, Azərbaycan istər ərazisinə, istər əhalisinə, istərsə də iqtisadiyyatına görə Cənubi Qafqaz regionunun ən böyük və ən inkişaf etmiş dövlətidir. Təsadüfi deyil ki, Cənubi Qafqaz regionunun ümumi daxili məhsulunun 80 faizi Azərbaycanın payına düşür.
A.Quliyev Azərbaycanın enerji resurslarının Avropa bazarlarına çatdırılmasının Rumıniya üçün böyük əhəmiyyətə malik olduğunu vurğulamışdır. Azərbaycanın demokratik Avropanın bir hissəsi olduğunu söyləyən deputat, ölkəmiz ilə Avropa İttifaqı arasında viza rejiminin sadələşdirilməsi haqqında Sazişin imzalandığını xatırlatmışdır. Bildirilmişdir ki, Azərbaycan Avropaya inteqrasiya yolunda ərazi bütövlüyünün pozulması problemi ilə üzləşmişdir. Bu problem Ermənistan-Azərbaycan, Dağlıq Qarabağ münaqişəsidir. Münaqişə nəticəsində Azərbaycan ərazisinin 20 faizi Ermənistan tərəfindən hərbi yolla işğal olunmuşdur. Bu məsələdə Avropa İttifaqının mövqeyini ortaya qoymasına ehtiyac vardır.
Azərbaycan ilə Rumıniya arasında münasibətlərin inkişaf etdiyini deyən Milli Məclisin deputatı rəsmi Buxarestin Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə göstərdiyi dəstəyə görə təşəkkürünü bildirmişdir.
Türkologiya və Şərqi Araşdırmalar İnstitutunun direktoru, Rumıniyanın Azərbaycandakı ilk səfiri Tasin Cəmil Azərbaycan-Rumıniya əlaqələrinin tarixindən danışmışdır. O bildirmişdir ki, Rumıniya Azərbaycanın müstəqilliyini tanıyan ikinci dövlət olmuşdur. Keçmiş sovet ölkələrindən ilk olaraq məhz Rumıniyanın Azərbaycanda səfirliyi fəaliyyətə başlamışdır. Bu gün ölkələrimiz arasında əlaqələr yüksək səviyyədədir.
Milli Məclisin deputatı Qənirə Paşayeva Azərbaycan ilə Rumıniya arasında əlaqələrin tarixi köklərinin XV əsrə gedib çıxdığını bildirmişdir. O, Azərbaycanda rumın şirkətlərinin sayının çoxaldığını, ölkəmiz tərəfindən Rumıniyaya sərmayə qoyuluşunun artdığını diqqətə çatdırmışdır. ARDNŞ-nin Rumıniya bazarına qoyduğu investisiyaların iki ölkə arasında iqtisadi əlaqələrin daha da güclənməsinə təkan verdiyi vurğulanmışdır. Deputat mədəniyyət, gənclər sahələrində əməkdaşlığın inkişafına da ehtiyacın olduğunu söyləmişdir.
Q.Paşayeva Avropanın enerji təhlükəsizliyində vacib rol oynayan Azərbaycanın həm enerji resurslarının hasilatçısı, həm də tranzit ölkə olduğunu vurğulamışdır.
Dağlıq Qarabağ münaqişəsindən danışan deputat torpaqlarımızın 20 faizinin işğalı nəticəsində bir milyondan çox azərbaycanlının qaçqın və məcburi köçkünə çevrildiyini bildirmişdir. O, münaqişənin ən böyük regional problemlərdən biri olduğunu söyləmişdir.
ARDNŞ-nin Rumıniya nümayəndəliyinin direktoru Həmzə Kərimov bildirmişdir ki, Prezident İlham Əliyevin apardığı uğurlu xarici siyasət nəticəsində Azərbaycan dünyanın enerji sektorunda əsas oyunçuya və neft-qaz ixracatçısına çevrilmişdir. Qeyd edilmişdir ki, Avropanın enerji təhlükəsizliyinin təmini üçün nəzərdə tutulmuş layihələrdə aparıcı rol oynayan Azərbaycan enerji nəqliyyatı infrastrukturuna milyardlarla dollar sərmayə yatırmaqla, dünyada böyük nüfuz qazanan ölkədir.
H.Kərimov Azərbaycanın təbii qazını Avropa bazarlarına çatdıracaq TAP, TANAP kimi layihələr haqqında danışmış, gələcəkdə boru kəmərlərinin Balkan ölkələrinə doğru genişləndirilməsi planının olduğunu bildirmiş, Rumıniya və Mərkəzi Avropaya qaz nəqlini nəzərdə tutan AGRİ layihəsinin perspektivlərindən söhbət açmışdır. O, həmçinin ARDNŞ-nin Rumıniyadakı fəaliyyətindən də bəhs etmişdir. Bildirilmişdir ki, indiyədək Rumıniyaya təxminən 50 milyon avro həcmində sərmayə qoyulmaqla bu ölkədə 25 yanacaqdoldurma məntəqəsi açılmış, nəticədə 300-dək yeni iş yeri yaradılmışdır. Yaxın zamanlarda ARDNŞ-nin yanacaqdoldurma məntəqələrini Rumıniyanın bütün regionlarında görmək mümkün olacaqdır.
“AGRİ LNG Project” şirkətinin direktoru Mitika Savu iştirakçılara AGRİ layihəsi barədə məlumat vermişdir. O, layihənin texniki-iqtisadi əsaslandırmasının son mərhələsinin nəticələrinin aprelin sonu, mayın əvvəlində hazır olacağını diqqətə çatdırmışdır.
“Geopolitika” jurnalının baş redaktoru Vasile Simileanu isə çıxışında beynəlxalq təşkilatları Cənubi Qafqazdakı problemlərə laqeyd qalmamağa çağırmışdır.
Bölmənin digər xəbərləri
