Dövlət İdarəçilik Akademiyasında Xocalı soyqırımı qurbanlarının xatirəsi anılıb VİDEO
Bakı, 25 fevral, AZƏRTAC
Fevralın 25-də Azərbaycan Respublikasının Prezidenti yanında Dövlət İdarəçilik Akademiyasında (DİA) Xocalı soyqırımının 24-cü ildönümünə həsr olunan anım tədbiri keçirilib.
AZƏRTAC xəbər verir ki, faciə qurbanlarının xatirəsi bir dəqiqəlik sükutla yad edildikdən sonra DİA-nın rektoru, akademik Urxan Ələkbərov çıxış edərək 1992-ci il fevralın 26-da Ermənistan silahlı birləşmələrinin Azərbaycan xalqına qarşı növbəti qanlı təcavüzə əl ataraq tarixdə misli görünməmiş soyqırımı törətdiyini deyib. Bildirib ki, Xocalı soyqırımı barədə dünya ictimaiyyətinin məlumatlandırılması işində dövlət strukturları ilə yanaşı, ictimai birliklər də mühüm rol oynayır. Xocalı soyqırımının dünyada tanıdılması istiqamətində Heydər Əliyev Fondunun fəaliyyəti xüsusi yer tutur. Fond Azərbaycan həqiqətlərinin dünya ictimaiyyətinə çatdırılması ilə bağlı mühüm işlər görür.
Rektor Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildən başlayan “Xocalıya ədalət!” beynəlxalq kampaniyası çərçivəsində dünyanın müxtəlif ölkələrində təbliğat işlərinin həyata keçirilməsinin uğurlu nəticələrini qeyd edib. Vurğulayıb ki, bu kampaniya yalnız beynəlxalq ictimaiyyəti Xocalı faciəsi barədə məlumatlandırmaq deyil, həm də dünyada oxşar hadisələrin baş verməməsinə çağırış məqsədi daşıyır.
“Xocalıya ədalət” Beynəlxalq Kampaniyası İctimai Birliyinin nümayəndəsi Fərid Cəfərov çıxış edərək Xocalı soyqırımının Azərbaycan xalqına qarşı törədilmiş ən qatı cinayətlərdən biri olduğunu söyləyib. O, faciəyə siyasi-hüquqi qiymətin verilməsi, onun bütövlükdə insanlıq əleyhinə cinayət faktının olması, analoji faciələrlə müqayisədə təhlili barədə fikir və mülahizələrini bildirib. Qeyd edib ki, “Xocalıya ədalət!” beynəlxalq kampaniyası çərçivəsində müxtəlif ölkələrdə həyata keçirilən tədbirlər, soyqırımının dünyada tanıdılması istiqamətində görülən işlər artıq öz nəticələrini verir.
Sonra DİA-nın tarix kafedrasının müdiri Firdovsiyə Əhmədova, beynəlxalq münasibətlər və xarici siyasət kafedrasının dosenti Elçin Əhmədov, hüquq kafedrasının professoru Bəhram Zahidov və digərləri çıxış ediblər. Onlar Xocalı soyqırımı ilə bağlı həqiqətlərin dünya ictimaiyyətinə hərtərəfli çatdırılması istiqamətində məqsədyönlü iş aparıldığını bildiriblər. Çıxış edənlər hər kəsi, xüsusilə də gəncləri “Xocalıya ədalət!” beynəlxalq kampaniyasına könüllü kimi qoşulmaqla yanaşı, onun vasitəsilə həyata keçirilən müxtəlif aksiyalarda fəal iştirak etməyə çağırıblar.
Tədbirdə Heydər Əliyev Fondunun dəstəyi ilə hazırlanan, Xocalı soyqırımına həsr olunan film nümayiş etdirilib.
Bölmənin digər xəbərləri
