Bakı, 1 sentyabr, AZƏRTAC

Günəşli sakit günlər, dəniz və oktyabrın sonundan tez olmayaraq rəngini dəyişməyən yaşıl meşələr, parklar və bağlar payız mövsümünü Azərbaycanda keçirənlərə zövq verir. Başqa ölkələrdə turistlərin proqramına tez-tez mane olan dəyişkən havalardan fərqli olaraq, buranın gözəl hava şəraitində istirahət etmək qonaqlarda xoş təəssürat doğurur.

Bakı bulvarı

Bakıda payız mövsümü adətən təqvimdə göstərildiyindən gec başlanır. Paytaxtda sentyabr ayı hamını 22-25 dərəcə isti hava ilə sevindirir.

Bakıda ikinci baharı abadlığı ilə seçilən və həmişə insanlarla dolub-daşan çoxsaylı şəhər parklarında keçirmək xoşdur. Xüsusən bir əsrdən çox yaşı olan və Azərbaycan paytaxtının görməli məkanlarından sayılan Dənizkənarı Milli Parkı - Bakı bulvarını gəzməyi tövsiyə edirik.

Dənizkənarı Milli Park gül-çiçəyə və yaşıllığa bürünüb. Bulvarın yubileyi ərəfəsində burada müxtəlif ölkələrdən gətirilən ekzotik bitkilər və kollar, xüsusən Argentinadan hər biri 7 ton ağırlığında 150 illik baobablar, böyük kaktuslar, qədim zeytun və palma ağacları əkilib. Bulvarın ərazisində onlarla rəngarəng attraksionlar, nəhəng attraksion-panoram, kafe və restoranlar, istirahətinizin şən və mənalı keçməsi üçün digər imkanlar mövcuddur. Dəniz səyahətini sevənlər üçün sərnişin gəmiləri, Yaxt-klub və üzən restoran fəaliyyət göstərir. Bulvarın “Bakı Venesiyası” adlanan guşəsində isə süni və dar kanalda üzən qayıq və qondolalarla həmin italyan şəhərində olduğu kimi, gəzintiyə çıxmaq olar.

Milli Musiqi Günü

Hər il sentyabrın 18-də - Azərbaycan professional musiqisinin banisi Üzeyir Hacıbəylinin anadan olduğu gündə ölkədə Milli Musiqi Günü qeyd olunur. Azərbaycan musiqi mədəniyyəti adlı-sanlı nümayəndələri və ənənələri ilə zəngindir. Azərbaycan və bütün Şərqdə ilk opera - Üzeyir Hacıbəylinin “Leyli və Məcnun” əsəri 1908-ci il yanvarın 12-də ilk dəfə tamaşaya qoyulub. Azərbaycan professional opera sənətinin tarixi də məhz bu mədəniyyət hadisəsindən başlayır. Üzeyir Hacıbəylinin “Leyli və Məcnun” operasının 100 illik yubileyinin rəsmi şəkildə bayram edilməsi UNESCO-nun “2008-2009-cu illərdə görkəmli şəxsiyyətlərin və əlamətdar hadisələrin qeyd edilməsi proqramına” daxil edilib. 

Milli Musiqi Günündə Üzeyir Hacıbəyli adına Bakı Musiqi Akademiyasının binası qarşısında ənənəvi olaraq tanınmış ictimai xadimlərin iştirakı ilə keçirilən rəsmi tədbirdə musiqiçilər də çıxış edir. Həmin günlər Bakıda keçirilən Üzeyir Hacıbəyli Beynəlxalq Musiqi Festivalında dünyanın müxtəlif ölkələrindən tanınmış musiqiçilər, ifaçılar və kollektivlər iştirak edir.

Bakı Beynəlxalq Caz Festivalı

Payızda Bakıda dünyanın ən məşhur ifaçılarının iştirakı ilə daha bir parlaq musiqi tədbiri - Bakı Beynəlxalq Caz Festivalı keçirilir. Azərbaycan paytaxtına gələn əcnəbi caz ulduzları yerli musiqiçilərlə yanaşı olaraq, tamaşaçılar qarşısında öz istedadlarını nümayiş etdirirlər. 

Bu il oktyabrın 14-dən 28-dək keçiriləcək festivalın proqramına Laura Poldvere (Estoniya), fransalı caz pianoçusu Jan-Kristof Şole, İsveçin “Music Music Music” kollektivi, “Kodaly and Spice Jazz” (Macarıstan), Martin Salemi triosu (Belçika), Helge Lien triosu (Norveç), Maykl Pipoquinha (Braziliya), Ruben Hein (Niderland), Qreqori Maret (ABŞ), Kristi Daşiyel (ABŞ) və digər ulduzlar daxildir.

Xatırladaq ki, Bakı Beynəlxalq Caz Festivalı 2002-ci ildən etibarən keçirilir. Festival çərçivəsində musiqiçilər Bakı Caz Mərkəzi, Beynəlxalq Muğam Mərkəzi, Heydər Əliyev Sarayı, Bakı Filarmoniyası və şəhərin digər müasir səhnələrində sıxış edirlər.

Tədbirin keçirildiyi günlərdə Bakıda sərgilər, əl işlərinin satışı, caz kinosu və gənc caz musiqiçilərinin müsabiqəsi də təşkil edilir.

Kulinariya

Azərbaycanda payız fəsli təbiətin səxavətlə bəxş etdiyi nemətləri sevənlər üçün əsl fürsətdir. Sentyabrda bolluğu ilə piştaxtaları bəzəyən əncir, qarpız, zoğal, qozun yerini heyva, xurma, muşmula, nar tutur. 

Təzə çəkilmiş nar şirəsi payızda səyahətçilərin rahat guşə tapacağı istər böyük restoranlarda, istərsə də yolkənarı kafelərdə nəfis hazırlanan balıq yeməklərinə xüsusi dad verir. Yerli meyvə və giləmeyvələrdən bişirilən mürəbbələr Azərbaycan çayxanalarına baş çəkənlərin çox xoşuna gəlir.

Nar festivalı

Azərbaycanlıların ən sevdiyi və meyvələrin şahı olan nar vitamin və sağlamlıq mənbəyidir. Ölkənin bərəkətli torpağı bu faydalı meyvənin bütün növlərini yetişdirmək üçün əlverişlidir. Nar becərilməsi üçün ideal iqlimi və torpağı olan Göyçay rayonu bu sahədə xüsusilə fərqlənir. Təsadüfi deyil ki, Nar festivalı da hər il məhz bu rayonda təşkil olunur. 

Festival payızın axırlarında - oktyabrın sonu - noyabrın əvvəlində narın yetişdiyi vaxt keçirilir. Mədəniyyət Nazirliyi və Göyçay Rayon İcra Hakimiyyəti tərəfindən təşkil edilən tədbirə Azərbaycanın müxtəlif yerlərindən və xarici ölkələrdən çoxlu sayda qonaq gəlir. Bu da təbiidir: bu cür rəngarəng nar çeşidləri və onlardan hazırlanan məzələrə buradan başqa heç bir yerdə rast gəlmək olmaz. Göyçayın 30-dan çox kəndinin fermerləri qonaqlara yeni mövsümdə narın 60 sortundan yığılan məhsulun dadına baxmağa imkan yaradır. Nazik qabığı və iri toxumları ilə fərqlənən “Vələs”, “Şirin”, “Gülöyşə”, “Şıxbaba” və digər sortlar daha məşhurdur. Festivalın gözəlliyi ondadır ki, qonaqlar bu məhsulların dadına baxa bilirlər. Təzə meyvələrlə yanaşı, nardan hazırlanan desertlər, piroqlar, şirələr də böyük marağa səbəb olur. Ət və balıq xörəkləri ilə birlikdə süfrəyə verilən narşərabı xüsusilə qeyd etmək lazımdır. Onu Azərbaycanda bütün ərzaq mağazalarından almaq olar, lakin qədim reseptlərlə hazırlanan narşərabın dadına yalnız festival günlərində baxa bilərsiniz.

Xalq gəzintiləri, artistlərin çıxışları, küçə tamaşaları festival iştirakçılarına və qonaqlara əsl bayram əhval-ruhiyyəsi bəxş edir.

Göyçaya getmək də çətin deyil, Bakı Beynəlxalq Avtovağzalından müntəzəm olaraq yola düşən avtobuslar üç saatdan da az müddətə sizi ünvana çatdıracaq.

Bakıda bal yarmarkası

Azərbaycan ekoloji cəhətdən təmiz məhsulları ilə tanınır. Onların arasında bal və bal məhsulları xüsusi yer tutur. Bakıda hər il Azərbaycanın arıçılıq təsərrüfatlarının ən yaxşı məhsullarının nümayiş etdirildiyi bal yarmarkası keçirilir. 

Yarmarka, bir qayda olaraq, oktyabrdan noyabradək davam edir. Burada ölkənin bütün bölgələrindən, o cümlədən yüksək dağ rayonlarından gətirilmiş ətirli bal və müalicəvi bal məhsulları təqdim edilir. Bütün məhsullar ciddi ekspertizadan keçirilir və lazımi standartlara cavab verdiyi halda yarmarkaya buraxılır.

Yarmarkaya gələnlər balın dadına baxa və müxtəlif bal növlərini, mum və süzmə çiçək balı, arı zəhəri, arı südü və yapışqanı kimi bal məhsullarını ala bilərlər. Burada məhsulların qiymətləri çox vaxt bazarda olduğundan aşağıdır.

Muzeylər və teatrlar

Payızda Bakıya gələnlərə paytaxtın teatr və muzeyləri ilə tanışlıq üçün əla fürsət yaranır. Muzey Mərkəzi, Milli Azərbaycan Tarixi Muzeyi, Nizami Gəncəvi adına Milli Azərbaycan Ədəbiyyatı Muzeyi, Azərbaycan Musiqi Mədəniyyəti Dövlət Muzeyi, Miniatür Kitab Muzeyi və Azərbaycan Milli İncəsənət Muzeyinə baş çəkmək Bakı teatrları ilə tanışlıq qədər maraqlı olacaq. Teatrlar arasında isə memarlıq üslubu, tarixi və repertuarı ilə təkrarolunmaz hesab edilən Azərbaycan Dövlət Akademik Milli Dram Teatrı, Azərbaycan Dövlət Akademik Opera və Balet Teatrı, Azərbaycan Dövlət Rus Dram Teatrı, Azərbaycan Dövlət Musiqili Komediya Teatrı və digərlərini qeyd etmək olar.

Bölgələrə səyahət

Sentyabr-oktyabr aylarında Azərbaycana ilk dəfə gələn əcnəbilərin çoxu minillik sirləri özündə qoruyub-saxlayan şəhərkənarı tarixi abidələrlə maraqlanır. Turist marşrutlarından biri sizi nadir məkana - Bakıdan 60 kilometr cənubda yerləşən, 2007-ci ildə UNESCO-nun Dünya İrsi Siyahısına daxil edilmiş Qobustan Dövlət Tarix-Bədii qoruğuna aparacaq. Qoruğun 537 hektar ərazisində dünyada ən böyük qayaüstü rəsmlərin kolleksiyası - 4 mindən çox petroqlif mövcuddur. 

Quba rayonunun Xınalıq kəndinə ekskursiya zamanı özünəməxsus ənənələr və mədəniyyətlə tanışlıq, Qalaaltı kəndinin yaxınlığında Çıraqqala (IV-V əsrlər) və digər maraqlı yerlər istirahətinizi daha məzmunlu edər.

Ov, balıqçılıq, göbələk və dərman bitkiləri toplamaq həvəskarları isə sakit göllərin əhatəsində mənzərəli meşələrə, şəfalı bulaqlara və qoruq ərazilərinə səyahət edə bilərlər.