Azərbaycanda Diş Əti Sağlamlığı Günü qeyd olunub
Bakı, 13 may, AZƏRTAC
Gingivit, parodontit və peri-implantit dünyada yüz milyonlarla insana təsir edən qeyri-yoluxucu xroniki iltihabi diş əti xəstəlikləridir. Baxmayaraq ki, diş əti xəstəliklərinin şəkərli diabet, xroniki böyrək çatışmazlığı, revmatoid artrit, xərçəngin bəzi növləri, erektil disfunksiya, hamiləliyin ağırlaşmaları, ürək-damar xəstəlikləri və digər xroniki patologiyalar ilə əlaqəsi və ümumi sağlamlığa ciddi təhlükə yarada biləcəyini göstərən müxtəlif elmi tədqiqatlar mövcuddur, həmin xəstəlik ictimaiyyət tərəfindən hələ də az tanınır.
Səhiyyə Nazirliyinin mətbuat xidmətindən AZƏRTAC-a bildiriblər ki, ölkəmizdə Azərbaycan Parodontologiya Cəmiyyətinin təşkilatçılığı və Səhiyyə Nazirliyinin dəstəyi ilə “Qanayan diş ətinə yox deyin” şüarı altında Beynəlxalq Diş Əti Sağlamlığı Günü qeyd olunub. Azərbaycanda 5 ildir ki, qeyd olunan bu günün məqsədi, xüsusən yeni növ koronavirus (COVID-19) pandemiyası dövründə insanlarda dişlər və implantlar ətrafında diş əti xəstəliklərinin ciddiyyəti haqqında ictimai məlumatlılığı artırmaq, diş əti sağlamlığının qorunub saxlanılmasının və erkən diaqnostikasının vacibliyini bildirmək ilə yanaşı, onun hamiləlik ağırlaşmaları, şəkərli diabet və ürək-damar xəstəlikləri ilə əlaqələrinin əhəmiyyətini ön plana çıxararaq gündəmə gətirməkdən ibarətdir. Bu il yeni növ koronavirus pandemiyası səbəbi ilə 50-dən çox ölkədə Avropa Parodontologiya Federasiyası ilə birgə təşkilata üzv olan ölkələrin Parodontologiya Cəmiyyətləri tərəfindən bu günə aid müxtəlif sosial maarifləndirici tədbirlər onlayn olaraq keçirilib.
Ə.Əliyev adına Azərbaycan Dövlət Həkimləri Təkmilləşdirmə İnstitutunun onlayn ixtisasartırma kursuna cəlb olunan həkim-stomatoloqlara institutun stomatologiya və üz-çənə cərrahiyyəsi kafedrasının dosenti, Azərbaycan Parodontologiya Cəmiyyətinin prezidenti, tibb üzrə fəlsəfə doktoru Cavid Əhmədbəyli tərəfindən “COVID-19 pandemiyası dövründə diş əti sağlamlığı. Ambulator şəraitdə parodont xəstəliklərinin cərrahi müalicəsi” mövzusunda onlayn məruzələr oxunub. Həmçinin Azərbaycan Tibb Universitetinin stomatologiya ixtisası üzrə təhsil alan tələbələrə universitetin terapevtik stomatologiya kafedrasının dosenti, Azərbaycan Estetik Stomatologiya Assosiasiyasının sədri, tibb elmləri doktoru Ramiz Əhmədbəyli və ortopedik stomatologiya kafedrasının assistenti, Azərbaycan Parodontologiya Cəmiyyətinin vitse-prezidenti, tibb üzrə fəlsəfə doktoru Aslan Məmmədov tərəfindən “Stomatoloji xəstəliklərin erkən diaqnostikası və müasir müalicə-profilaktika tədbirləri” mövzusunda onlayn seminarlar keçirilib. Bununla yanaşı, Azərbaycan Parodontologiya Cəmiyyətinin vitse-prezidenti, Diş Əti Sağlamlığı Gününün Azərbaycan koordinatoru Rövşən Məmmədov tərəfindən bu günə həsr olunmuş nəşrlər və videolar ölkəmizdə fəaliyyət göstərən həkimlərə və cəmiyyətin üzvlərinə göndərilib. Bundan əlavə, Azərbaycan dilində vebinarlar, sosial media kampaniyaları, “Instagram” və “Facebook”da canlı yayım sessiyaları kimi bir çox maarifləndirmə tədbirləri keçirilib.
Bölmənin digər xəbərləri
