İranın “Fərəh” peyvəndi klinik sınağın 3-cü mərhələsindən də uğurla çıxıb
Tehran, 29 sentyabr, AZƏRTAC
İranın milli istehsalı olan “Fərəh” peyvəndi klinik sınağın 3-cü mərhələsindən də uğurla çıxıb və yaxın vaxtlarda istifadə olunacaq.
AZƏRTAC xəbər verir ki, bu barədə İranın Səhiyyə Nazirliyinin açıqlamasında deyilir. Bildirilib ki, 40 minə yaxın könüllünün üzərində aparılan sınaq yeni peyvəndin səmərəli olduğunu göstərib. Buna baxmayaraq, İran Çindən və Avropadan peyvənd idxal edib və əhalinin peyvəndlənməsi davam edir. Bu günə qədər İranda 37 milyondan çox peyvəndin birinci, 17 milyona yaxın ikinci dozası vurulub. Ümumilikdə İranda 53 milyondan çox peyvənd vurulub. Bunun nəticəsidir ki, ölkədə koronavirusa yoluxma və ölüm hallarında azalma müşahidə edilir.
Nazirliyin açıqlamasında nəzərə çatdırılıb ki, son 24 saat ərzində ölkədə 13 min 271 nəfər koronavirusa yoluxub, 272 nəfər isə bu virusdan həyatını itirib. Bununla da İranda virusa yoluxanların ümumi sayı 5 milyon 572 min 962 nəfərə, ölənlərin ümumi sayı isə 120 min 160-a çatıb. Eyni zamanda, 5 milyon 673 nəfər sağalaraq evə buraxılıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
