Ramil Orucov: Azərbaycan dünyanın siyasi arenasında baş verən məsələlərə təsir göstərmək imkanlarına malikdir
Bakı, 21 iyun, AZƏRTAC
Müstəqil Azərbaycan milli maraqlarına xidmət edən bərabərhüquqlu və qarşılıqlı əməkdaşlıq əsasında xoşniyyətli tərəfdaşlar üçün unikal dövlətlər sırasında yer alıb. Azərbaycan Prezidenti İlham Əliyevin çoxşaxəli, davamlı siyasəti, böyük siyasi iradəsi sayəsində Azərbaycan təhlükəsizlik adasına çevrilib. Ölkəmiz siyasi-ictimai sabitliyi, sosial rifahı, güclü iqtisadiyyatı, uğurlu xarici siyasəti, reallıqları ilə beynəlxalq ictimaiyyətin diqqət mərkəzindədir. Ən diqqətçəkən məqam isə Azərbaycanın sivilizasiyalararası əməkdaşlığa imza atıldığı məkana çevrilməsidir.
Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə reallaşan, dünyanın 50-dən çox ölkəsinin nüfuzlu siyasi xadimlərinin, həmçinin beynəlxalq təşkilatların nümayəndələrinin iştirak etdiyi IX Bakı Qlobal Forumu bir daha təsdiq etdi ki, Azərbaycan dünyanın siyasi arenasında baş verən məsələlərə təsir göstərmək imkanlarına malikdir.
Bu sözləri AZƏRTAC-a açıqlamasında YAP Gəncə şəhər təşkilatının sədri Ramil Orucov söyləyib.
O bildirib ki, Bakı Qlobal Forumunun bütün toplantılarında bəşəriyyəti təhdid edən ciddi qlobal problemlərin həllinin, vəziyyətdən çıxış yollarının axtarılması, beynəlxalq birliyə mühüm mesajların ünvanlanması da təsdiq edir ki, Azərbaycanın əsas məqsədi dünyada sülh, dinc birgəyaşayış, ədalətin bərqərar olunması naminə həyata keçirilən fəaliyyətlərə öz töhfələrini verməkdir.
YAP Gəncə şəhər təşkilatının sədri diqqətə çatdırıb ki, “Qlobal dünya nizamına təhdidlər” mövzusunda beynəlxalq məsələlərin müzakirə edildiyi IX Qlobal Bakı Forumun ilk günündə Prezident İlham Əliyev bəşəriyyəti narahat edən bütün təhdidlərə toxunaraq bəyan etdi ki, dünya nizamının ciddi dəyişikliyə və yeni yanaşmaların işlənib hazırlanmasına ehtiyac var:” Qarabağ münaqişəsinin həlli, zənnimcə, regionda təhlükəsizlik üçün, regionda sülh üçün bir fürsətdir. Keçən dəfə görüşəndə mən işğal, dağıntı və xalqımızın demək olar ki, otuz il əziyyət çəkdiyi humanitar böhranla bağlı məsələyə geniş şəkildə toxundum. Bunları təkrarlamaq istəmirəm, bunlar artıq məlumdur. Çünki işğaldan azad edilmiş ərazilərdə o qədər ziyarətçilər - siyasətçilər, ictimai xadimlər, jurnalistlər, vətəndaş cəmiyyətinin nümayəndələri olublar, onlar hər şeyi, erməni işğalından sonra hansı dağıntıların qaldığını öz gözləri ilə görüblər”.
R.Orucovun sözlərinə görə, beynəlxalq gündəlikdə duran əsas məsələlərdən olan təhlükəsizlik məsələsinə diqqət çəkən dövlətimizin başçısı xüsusilə qeyd edib ki, hər bir ölkə təhlükəsizlik tədbirləri ilə bağlı öz töhfəsini verməlidir. Prezident İlham Əliyev bir daha vurğulayıb ki, hazırda qalib ölkə kimi diktə edən tərəf Azərbaycandır. Ermənistan isə ölkəmizin sülh danışıqları üçün irəli sürdüyü 5 prinsipdən ibarət təklifini qəbul etsə də, son zamanlar artıq mövcud olmayan "Dağlıq Qarabağın statusu" məsələsini gündəmə gətirməklə bəhanələr uydurur. Amma bu hal yalnız Ermənistanın ziyanına işləyir və bu, tamamilə səmərəsiz, Ermənistanın özü üçün təhlükəlidir. Çünki artıq “Dağlıq Qarabağ” mövcud deyil. Dağlıq Qarabağ Muxtar Vilayəti Azərbaycan parlamentinin qərarı ilə 1991-ci ilin sonlarında ləğv edilib.
“Prezident İlham Əliyev qəti şəkildə qeyd edib ki, bizim ərazimizdə belə bir inzibati struktur yoxdur. Bu səbəbdən, dırnaqarası statusla bağlı istənilən istinad yeni qarşıdurmaya gətirib çıxaracaq. Ermənistan hökuməti bunu anlamalı və tarixi yenidən yazmaq cəhdlərindən çəkinməlidir, çünki tarix artıq yazılıb.
Bəli, tarix artıq yazılıb. Qalib Azərbaycan dövləti Prezident, Ali Baş Komandan İlham Əliyevin rəhbərliyi ilə Cənubi Qafqazın lider dövləti kimi artıq beynəlxalq əməkdaşlıq və təhlükəsizliyə mühüm töhfələr verir, dünyanın siyasi arenasında öz dəst-xəti ilə seçilir”, - deyə Ramil Orucov fikirlərini yekunlaşdırıb.
Bölmənin digər xəbərləri
