ELM VƏ TƏHSİL


Xəzər Universitetində Konfutsi İnstitutunun filialı açılmışdır

Bakı, 18 aprel (AZƏRTAC). Xəzər Universitetində Çin Xalq Respublikasının Azərbaycandakı səfiri Xun Tşyuinin iştirakı ilə Bakı Dövlət Universiteti (BDU) nəzdindəki Konfutsi İnstitutunun Xəzər Universiteti filialının açılışı və bu tədbirlə əlaqədar “Çin mədəniyyəti günü” keçirilmişdir.

Xəzər Universitetindən AZƏRTAC-a bildirmişlər ki, bu ali təhsil ocağının Şərq dilləri və din araşdırmaları departamenti və Konfutsi İnstitutunun birgə əməkdaşlığı ilə hazırlanmış tədbirdə Xəzər Universitetinin təsisçisi, Direktorlar və Qəyyumlar Şurasının sədri, professor Hamlet İsaxanlı Çinin dünya mədəniyyətindəki tarixi rolu, onun son dövrlərdə dünya iqtisadiyyatının aparıcı güclərindən birinə çevrilməsi, Çin və Azərbaycan arasında əlaqələrin tarixi haqqında, həmçinin, Çin dili və mədəniyyətinin qloballaşan dünyada yerindən danışmışdır.

O, Çin mədəniyyətinin dünyaya tanıdılmasında, Çinin digər ölkələrlə mədəni, iqtisadi və elmi əlaqələr qurmasında Konfutsi institutlarının çox böyük rola malik olduğunu vurğulamış və BDU-nun nəzdindəki Konfutsi İnstitutunun Xəzər Universitetindəki filialına bu sahədə uğurlar arzulamışdır.

Səfir Xun Tşyuin Xəzər Universitetində Çin dili və mədəniyyətinə marağın əhəmiyyətini vurğulamış və bunun iki ölkə arasında çoxsahəli əməkdaşlığa müsbət təsiri olduğunu bildirmişdir.

BDU-nun nəzdindəki Konfutsi İnstitutunun direktorları Oqtay Cəlilbəyli və xanım Xu Fenxuanın çıxışlarından sonra Xəzər Universiteti ilə BDU nəzdindəki Konfutsi İnstitutu arasında ikitərəfli müqavilə imzalanmışdır.

Sonra qonaqlar Çin mədəniyyətinin müxtəlif atributlarından – xəttatlıq, təsviri incəsənət və digər əl sənəti nümunələrindən ibarət sərgi ilə tanış olmuş, Xəzər Universitetinin tələbələrindən ibarət rəqs qrupunun ifasında Çin milli rəqsini izləmiş və tələbələrin ifa etdikləri Çin milli mahnılarını dinləmişlər.

Tədbirin ikinci hissəsi BDU Konfutsi İnstitutunun Xəzər Universiteti filialı üçün yaradılmış mərkəzdə davam etmişdir. Mərkəzin açılış mərasimində iştirakçılar Konfutsi İnstitutunun müəllim heyəti tərəfindən tədris olunan Çin dili dərsinin bir hissəsini dinləmişlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.