ABŞ hərbçilərinin Almaniyadan çıxarılması ölkədə minlərlə iş yerinin itirilməsi riski yaradır
ABŞ Prezidenti Donald Trampın Almaniyadan azı 5 min amerikalı hərbçini çıxarmaq planı ölkənin bir sıra bölgələrində minlərlə iş yerinin itirilməsi ilə nəticələnə bilər.
AZƏRTAC “Spiegel” nəşrinə istinadla xəbər verir ki, Mannheim şəhərindəki ZEW İqtisadi Araşdırmalar Mərkəzi və Köln Universitetinin birgə araşdırmasında çıxarılan hər amerikalı hərbçiyə görə hərbi bazaların yerləşdiyi ərazilərdə orta hesabla yarımştat iş yerinin ləğv oluna biləcəyi qeyd edilib. Tədqiqat 1990-cı illərdə “Soyuq müharibə”nin başa çatmasından sonra təxminən 200 min ABŞ hərbçisinin Almaniyanı tərk etməsinin iqtisadi nəticələrinə əsaslanır. Araşdırmaya görə, həmin dövrdə hərbi bazaların bağlanması təkcə ABŞ obyektlərində deyil, ətraf regionlardakı şirkətlərdə də ciddi sayda iş yerinin itirilməsinə səbəb olub. İş yerlərinin təxminən 61 faizinin yerli müəssisələrdə itirildiyi qeyd edilir. Buna əsas səbəb kimi hərbçilərin və onların ailələrinin istehlak xərclərinin azalması göstərilir.
Araşdırmada vurğulanır ki, xüsusilə zəif əmək bazarına malik bölgələr bu prosesdən daha ciddi zərər görüb. Eyni zamanda, yerli büdcə gəlirlərində təxminən 9 faizlik azalma qeydə alınıb. Nəticədə bələdiyyələr xərcləri azaltmağa və vergi dərəcələrini artırmağa məcbur qalıb.
Ekspertlərin fikrincə, hərbi bazaların bağlanmasının sosial-iqtisadi təsirləri uzunmüddətli xarakter daşıyır. İşini itirən şəxslər 15 il sonra belə əmək bazarında daha zəif mövqedə qalır və orta gəlirləri təxminən 9 faiz azalır.
Elvin Mövsüm
Bölmənin digər xəbərləri
