ABŞ-ın 20-dən çox şəhərində ən aşağı temperatur rekordu qeydə alınıb
Bakı, 17 fevral, AZƏRTAC
ABŞ-ın 21 şəhəri bütün meteoroloji müşahidələr dövrünün ən soyuq 16 fevralı ilə qarşılaşıb.
AZƏRTAC ABŞ KİV-lərinə istinadla xəbər verir ki, ən soyuq hava Nebraska ştatının Linkoln və Hastinqs şəhərlərində qeydə alınıb. Fevralın 16-da bu şəhərlərdə temperatur müvafiq olaraq mənfi 35 və 34 dərəcəyə qədər enib. Luiziana ştatının Yeni Orlean şəhərində isə rekordun təzələnməsi üçün temperaturun mənfi 3,8 dərəcəyə enməsi kifayət edib.
Rekord soyuq hava ölkənin 11 ştatında - Nebraska, Ayova, Kanzas, Missuri, Oklahoma, Texas, Tennessi, Arkanzas, Alabama, Missisipi və Luizianada hökm sürür.
ABŞ Meteorologiya Xidməti ölkənin bir sıra regionlarında qar fırtınası və yolların buz bağlaması barədə xəbərdarlıq yayıb. Əlverişsiz hava şəraiti Birləşmiş Ştatların 200 milyon sakininə təsir edib. Ən ağır vəziyyət 3,3 milyon insanın elektrik enerjisiz qaldığı Texas ştatında qeydə alınıb. Son məlumata görə, ABŞ-da kəskin soyuqlar 15 nəfərin həyatına son qoyub.
Bölmənin digər xəbərləri
