ABŞ-IN SABİQ PREZİDENTİ RONALD REYQAN VƏFAT ETMİŞDİR
Son vaxtlar Ronald Reyqanın səhhətinin xeyli pisləşdiyi haqda xəbərlər yayılırdı. Xatırladaq ki, 1994-cü ildə sabiq prezidentə beyin hüceyrələrini dağıdan müalicəolunmaz altzeymer xəstəliyi diaqnozu qoyulmuşdu.
“Böyük amerikalı vəfat etmişdir”. Bu sözləri ABŞ Prezidenti Corc Buş R.Reyqan haqqında demişdir. C.Buş telefonla mərhumun arvadı Nensi Reyqana bütün amerikalılar adından dərin hüznlə başsağlığı vermişdir.
C.Buş ABŞ-ın dünyasını dəyişən 40-cı prezidenti barədə onu da demişdir ki, o, özündən sonra tərəqqi yoluna çıxardığı bir ölkəni və xilas etdiyi sülhü qoyub gedir. Reyqanın prezident olduğu müddətdə ABŞ narazılıqlar və şübhələr erasına son qoymuşdur. İndi onunla vidalaşırıq və ona öz dərin minnətdarlığımızı bildiririk.
Reyqanın vida mərasimi iyunun 7-də onun, Simi-Velli şəhərindəki memorial kitabxanasında, sonra isə ABŞ Konqresinin binasında olacaqdır. Ronald Reyqan cümə axşamı Simi-Vellidə torpağa tapşırılacaqdır.
Ronald Reyqan ABŞ-ın prezidenti vəzifəsinə ilk dəfə 1980-ci ildə 69 yaşında ikən seçilmişdi. 1984-cü ildə Ronald Reyqan seçkilərdə inamlı qələbə qazanaraq, prezident kürsüsündə ikinci müddətə qalmışdı. Keçmiş sovet imperiyası üzərində “soyuq müharibə”də qələbəni amerikalılar məhz onun adı ilə bağlayırlar.
1981-ci il martın 30-da prezident Reyqana qarşı sui-qəsd həyata keçirilmişdi. “Vaşinqton” mehmanxanasını buradakı çıxışından sonra tərk edən Reyqana Con Hinkli tərəfindən 6 güllə atılmışdır. Güllə prezidentin ürəyinə yaxın dəysə də, o, sağala bilmişdi. Siyasi karyeraya başlamazdan əvvəl aktyor olan Ronald Reyqan ötən əsrin 40-50-ci illərində Hollivudun 50-yə yaxın filmində çəkilmişdir. O, sabiq Amerika prezidentləri arasında ən uzunömürlüsüdür.
