ABŞ RUSİYADAN İZAHAT TƏLƏB EDİR

17.05.2006 [15:19]
Çap et
A⁺ A^-

ABŞ hökuməti İran Prezidenti Mahmud Əhmədinejadın Şanxay Əməkdaşlıq Təşkilatının (ŞƏT) qarşıdakı zirvə toplantısının işində iştirakı barədə Rusiyadan izahat almaq niyyətindədir. AZƏRTAC “Novosti” agentliyinə istinadla xəbər verir ki, bunu Dövlət Departamentinin rəsmi nümayəndəsi Şon MakKormak bildirmişdir.

O, Vaşinqtonda jurnalistlərə demişdir: “Mən mətbuatın bu barədə xəbərini oxumuşam və biz müəyyən izahat almaq istəyirik. Biz bu məsələni Rusiya hökuməti qarşısında qaldıracağıq”.

Rusiya XİN-in başçısı Sergey Lavrov bu bəyanatı şərh edərək bildirmişdir ki, İran rəhbəri zirvə toplantısına müşahidəçi qismində dəvət olunmuşdur. Qarşıdakı görüşdə İranın nüvə problemi müzakirə edilməyəcəkdir.

İran Prezidenti Mahmud Əhmədinejadın ŞƏT görüşündə iştirak etmək niyyətində olduğunu bu günlərdə ölkə hökumətinin rəsmi nümayəndəsi bildirmişdir.

ŞƏT-in zirvə toplantısı iyunun 15-də Şanxayda keçiriləcəkdir.