REGİONLAR
Abşeron rayonunda ötən tədris ilində 109 hazırlıq qrupu açılıb VİDEO
Xırdalan, 9 sentyabr, Ətrabə Rzayeva, AZƏRTAC
Abşeron rayonunda 38 tam orta və 1 ümumi orta təhsil müəssisəsi fəaliyyət göstərir. Heydər Əliyev Fondunun hesabına Masazır və Mehdiabad qəsəbələri üçün 1200 şagird yerlik məktəb binası tikilib və bu günlərdə istifadəyə veriləcək.
AZƏRTAC xəbər verir ki, bu fikirlər Xırdalandakı Heydər Əliyev Mərkəzində keçirilən ənənəvi sentyabr konfransında səsləndirilib.
Əvvəlcə tədbir iştirakçıları ümummilli lider Heydər Əliyevin abidəsini ziyarət edərək önünə tər güllər düzüblər.
Konfransda rayon təhsil şöbəsinin müdiri Nazilə Məmmədova ötən tədris ilində əldə olunan nailiyyətlər və yeni dərs ilinə hazırlıq barədə məlumat verib. Bildirilib ki, əsas məqsəd təhsil müəssisələrinin fəaliyyətinin yeni keyfiyyət göstəriciləri baxımından qurulmasına, elmi-pedaqoji, metodik, tədris-pedaqoji ədəbiyyatlardan, İKT avadanlıqlarından səmərəli istifadə olunmasına kömək göstərməkdir. Qeyd edilib ki, rayon üzrə ötən tədris ilində 109 hazırlıq qrupu açılıb, 2017-2018-ci tədris ilində isə 2 min 463 şagird üçün 121 sinfin açılması proqnozlaşdırılır. Rayon məzunlarının müvəffəqiyyəti IX siniflər üzrə 73,5 faiz, XI siniflər üzrə 74,3 faiz təşkil edib. Doqquzuncu sinfi bitirənlərdən 23-ü, XI sinif məzunlarından isə 20-si müvafiq təlimdə göstərdiyi uğurlara görə fərqlənmə attestatı alıb, üç nəfər isə təhsildə fərqləndiyinə görə qızıl medala layiq görülüb. 2016-2017-ci dərs ili məzunlarının ali məktəblərə qəbul göstəricisi keçən illərə nisbətən daha yüksək olub. Belə ki, rayonun ümumtəhsil məktəblərinin 2 min 74 məzunundan 1523-ü ali məktəblərə sənəd verib. Onlardan 956-sı respublikanın ali məktəblərinin, 51-i isə xarici ölkələrin universitetlərinin tələbəsi adını qazanıb. İmtahanların nəticələrinə əsasən, 65 məzun 600-dən çox bal toplayıb.
Təhsil nazirinin müavini Ceyhun Bayramov təhsil müəssisələrinin maddi-texniki bazasının möhkəmləndirilməsində Heydər Əliyev Fondunun müstəsna xidmətlərini vurğulayıb. O, “Yeniləşən Azərbaycan yeni məktəb”, “Təhsilə dəstək”, “Uşaq evləri və internat məktəblərinin inkişafı” proqramları və digər layihələrin bu sahənin inkişafında mühüm rol oynadığını qeyd edib. C.Bayramov, həmçinin Təhsil Nazirliyi tərəfindən tədrisin keyfiyyətini yüksəltmək məqsədilə aparılan işlər barədə geniş məlumat verib.
Tədbirdə təhsil sahəsində qazanılan uğurlar münasibətilə müəllimləri və tələbələri təbrik edən rayon icra hakimiyyətinin başçısı İradə Gülməmmədova diqqətə çatdırıb ki, Azərbaycanda təhsilin və elmin inkişafına daim dövlət qayğısı göstərilir. Bu sahələrin tərəqqisi isə ölkəmizin sürətli inkişafına töhfəsini verməkdədir.
Sonda rayonun bir qrup qabaqcıl müəlliminə fəxri fərmanlar təqdim edilib, ali məktəblərə yüksək balla qəbul olan tələbələr isə mükafatlandırılıb.