ACARISTAN AZƏRBAYCANLILARI: BİZ PREZİDENT HEYDƏR ƏLİYEVİN DƏSTƏYİNİ HƏMİŞƏ DUYURUQ
Gürcüstanın Acarıstan Muxtar Respublikası Azərbaycandan min kilometr uzaqda yerləşsə də, bu barlı-bərəkətli və qonaqpərvər diyarı özümüzə doğma bilirik və bu doğmalığı orada yaşayan 1300-dən çox soydaşımız yaratmışdır. Onlar öz halal zəhməti, bilik və təcrübəsi, yüksək peşəkarlığı ilə hamının etimadını qazanmışlar, iqtisadi və siyasi həyatda yaxından iştirak edirlər.
Xüsusi müxbiriniz bu günlərdə Acarıstanda olmuş və Batumidəki Mirzə Fətəli Axundov adına Azərbaycan mədəni-xeyriyyə cəmiyyətinin sədr əvəzi, şəhər məclisinin deputatı, Batumi bələdiyyəsinin üzvü Məhbub Əmirovla, muxtar respublikada adları hörmətlə çəkilən bir sıra azərbaycanlılarla görüşmüşdür. Onlar Prezident Heydər Əliyevin rəhbərliyi ilə Azərbaycanda həyata keçirilən islahatlarla, xalqımızı illərdən bəri ağrıdan Dağlıq Qarabağ probleminin həlli və digər məsələlərlə maraqlanmışlar.
Məhbub Əmirov cəmiyyətin fəaliyyətindən, soydaşlarımızın həyatından danışaraq demişdir:
- Görkəmli Azərbaycan mütəfəkkiri və yazıçısı M.F.Axundovun adını daşıyan cəmiyyətimiz artıq dörd ildir fəaliyyət göstərir və 600 nəfərdən çox soydaşımızı birləşdirir. Onun yaradılmasında biz ən əvvəl xalqımızın dahi oğlu Prezident Heydər Əliyevə minnətdarıq. Biz bu cəmiyyəti çoxdan yaratmaq istəyirdik, amma imkanımız yox idi. Azərbaycan Prezidenti bu istəyimizdən xəbər tutanda köməyini əsirgəmədi. Onun tapşırığı ilə Şəmkir rayon icra hakimiyyətinin başçısı Aslan Aslanov, habelə Azərbaycanın Gürcüstandakı səfirliyi bizə lazımi kömək etdilər. Biz Azərbaycan Prezidenti Heydər Əliyevin dəstəyini həmişə duyuruq. Cəmiyyətimizin nəzdində gənclər təşkilatı da yaratmışıq, Vətənlə də daim əlaqə saxlayırıq.
Cəmiyyət Azərbaycanı Acarıstanda layiqincə təmsil və təbliğ etmək məqsədi ilə müxtəlif mədəni tədbirləri həyata keçirir. Aztəminatlı soydaşlarımıza əl tuturuq. Cəmiyyətimizin və Şəmkir rayon rəhbərliyinin vəsaiti hesabına bir nəfər azərbaycanlı gənc Tbilisi Dövlət Universitetinin hüquq fakültəsində, iki nəfər isə Acarıstan Dövlət Universitetində təhsil alır.
Biz Acarıstanı xoş təəssüratla tərk etdik, sevindik ki, Gürcüstanın başqa bölgələrində olduğu kimi, soydaşlarımız burada da ölkələrimizin xalqlarının çoxəsrlik əlaqələrini, prezidentlər Heydər Əliyev ilə Edurad Şevardnadze arasındakı səmimi dostluğu əziz tutur və daha da möhkəmlənməsinə öz töhfələrini verirlər.
Şahismayıl Məmmədov
AZƏRTAC-ın xüsusi müxbiri
Batumi
Bölmənin digər xəbərləri
