ADFA vitse-prezidenti “Natəvan” bazar günü məktəbinin uğurları haqqında danışıb
Bakı, 12 oktyabr, Anara Axundova, AZƏRTAC
“Association Dialogue France-Azerbaidjan” (Fransa-Azərbaycan Dialoqu Assosiasiyası, ADFA) nəzdində olan “Natəvan” bazar günü məktəbində ikinci tədris mövsümü başlayıb. Məktəb Azərbaycanın Fransadakı səfirliyi, Azərbaycan Respublikasının Diasporla İş üzrə Dövlət Komitəsi və “ALIM” elmi assosiasiyasının dəstəyi ilə 2022-ci ildə Parisdə yaradılıb.
Məktəbin yaradılması və fəaliyyəti haqqında AZƏRTAC-a layihənin rəhbəri, ADFA vitse-prezidenti Aytən Muradova məlumat verib.
“Bazar günü məktəbini yaratmaq ideyası çoxdan yaranıb, burada uşaqlar Azərbaycan dili, milli mədəniyyət, musiqi, rəqslərlə tanış olmaq imkanı əldə edirlər. Biz məktəbi bir qədər öncə açmaq istəyirdik, lakin COVID-19 pandemiyası bunu “fiziki” olaraq həyata keçirməyə mane oldu. Bunu nəzərə alaraq biz layihəyə onlayn-formatda start verdik, lakin canlı ünsiyyət və kontakt həm uşaqlara, həm də müəllimlərə lazımdır. Ötən il Azərbaycanın Fransadakı səfiri Rəhman Mustafayev (hazırda Azərbaycanın Niderlanddakı səfiri - red.qeydi) sayəsində xəyalımız nəhayət reallaşdı. Onun sayəsində həftədə bir dəfə səfirliyin Mədəniyyət mərkəzində dərs keçirmək imkanı yarandı.
Biz məktəbə Azərbaycanın görkəmli şairəsi, sonuncu Qarabağ xanının qızı Xurşidbanu Natəvanın adını verməyi qərara aldıq, çünki o, zəmanəsinin savadlı insanı, tanınmış şairə, ictimai xadim olub. Onunla bağlı nə varsa, təhsilə müəyyən aidiyyətı var, biz də məhz bununla məşğuluq”.
Aytən Muradovanın sözlərinə görə, uşaqlar bazar günü məktəbinə böyük məmnuniyyətlə gedirlər, burada, yeri gəlmişkən, təkcə azərbaycanlı ailələrdən olan uşaqlar yox, həm də digər millətlərin nümayəndələri də təhsil alır.
“Dərslərimiz çox sərbəst şəraitdə keçir, - deyə layihənin rəhbəri davam edir. - Dərslər təkcə Azərbaycan dilinin öyrənilməsini ehtiva etmir; musiqi, ifa sənəti, rəsm dərslərimiz var, bu tədris ilindən başlayaraq isə Azərbaycan rəqslərini də tədris etməyə başlayırıq”.
Onun sözlərinə görə, məktəbdə Azərbaycanın bayramları və əlamətdar hadisələrinə xüsusi diqqət yetirilir. “Biz həm Azərbaycan, həm də beynəlxalq bayramları, o cümlədən Novruz və Yeni il bayramlarını qeyd edirik. Uşaqlar məmnuniyyətlə Vətən haqqında şeirlər deyirlər, milli rəqslərlə çıxış edirlər, Azərbaycan dilində mahnılar oxuyurlar”, - deyə Aytən Muradova vurğulayıb.
ADFA-nın vitse-prezidentinin bəhs etdiyinə görə, Azərbaycan səfirliyi bütün təşəbbüslərdə onlara kömək edir və onun fəaliyyətində birbaşa iştirak edir. Belə ki, misal üçün, Azərbaycanın Fransadakı indiki səfiri Leyla Abdullayeva dərslərdə iştirak edir və uşaqlara nağıllar oxuyur.
“Bizə göstərdikləri dəstəyə görə səfirliyə, Azərbaycan Respublikasının Diasporla İş üzrə Dövlət Komitəsinə və Azərbaycan Diasporuna Dəstək Fonduna çox minnətdarıq, - deyə Aytən Muradova qeyd edib. - Biz hesab edirik ki, belə məktəblər təkcə Parisdə deyil, həm də bütün Fransada yaradılmalıdır. Biz istənilən əməkdaşlığa və ideyamızın təşviqinə açığıq. O təkcə bizim məktəbin çərçivələri ilə məhdudlaşmamalıdır”.
Bölmənin digər xəbərləri
