ADU-da Çinin romantik bayramları ilə bağlı mühazirə oxunub
Bakı, 4 sentyabr, AZƏRTAC
Azərbaycan Dillər Universitetinin (ADU) Konfutsi İnstitutunun “Çin mədəniyyəti” yay onlayn lektoriyası çərçivəsində ənənəvi Çin Tsisi festivalına həsr olunmuş “Çin mədəniyyətində romantik bayramlar” mövzusunda mühazirə oxunub.
ADU-dan AZƏRTAC-a bildirilib ki, Konfutsi İnstitutunun direktoru Rafiq Abbasov mühazirəsində Tsisi festivalının - Sevgililər Gününün qədim “Çoban və toxucu qız” əfsanəsi ilə bağlı olduğunu qeyd edib. Bildirib ki, əfsanə Samanyolu üzərində ildə yalnız bir dəfə görüşməyə icazə verilən ayrılmış sevgililərdən bəhs edir. Bu ənənəvi bayram Çin folklorunda, qədim Çin şairləri Du Fu və Xe Ninin şeirlərində də öz əksini tapıb. Çinli qadınlar onlara sevgi, müdriklik, yaxşı ər, xoşbəxtlik və toxuculuq bacarıqları bəxş etmək üçün Göy Toxucuya müraciət edirlər. Tsisi festivalı zamanı “tsiaogo” - nazik qızardılmış xəmir, qovun, şirin düyü topları və qırmızı lobya şorbası hazırlamaq adətdir. Həmçinin qədim dövrlərdə bayram toxuculuq məharətinin nümayişi, fal ayinləri və səmavi Pəriyə qurban təqdim edilməsi ilə müşayiət olunurdu. Bu gün çinli cütlüklər təbiət və ulduzlarla əlaqəli olan bu bayramı səmaya fənərlər buraxaraq, sevgi və xoşbəxtlik üçün dua edərək, gül və zinət əşyaları verərək qeyd edirlər. Başqa bir qədim Çin romantik bayramı Yeni il şənliklərində də rəngarəng fənərlərin yandırılması ilə başa çatan Fənər festivalıdır. Keçmişdə subay qızların evdən müşayiətsiz çıxmasına icazə verilirdi ki, gənclər öz həyat yoldaşlarını seçə bilsinlər. 2000-ci illərin əvvəllərində Çində sevgililər üçün qeyri-rəsmi gənclər bayramı-“520” adlı bayram da meydana çıxdı. Bu qeyri-adi ad mayın 20-si Çin dilində “Mən səni sevirəm” sözünün ifadəsinə bənzəməsi ilə bağlıdır. Bu gün məhz sevgi etirafları günüdür, romantik fotosessiyalarla məşhurdur, çinli cütlüklər həmin tarixlərdə görüşə gedir, bir-birinə hədiyyə verir və ənənəvi “hun bao” - içərisində pul olan qırmızı zərflər göndərirlər. Qərbdə də Sevgililər Günü müasir Çin şəhər mədəniyyətinin bir hissəsinə çevrilib, küçə tədbirləri və çinlilər öz sevdiklərinə minnətdarlıq və sevgilərini ifadə etmək üçün gül və şokolad kimi hədiyyələr verirlər.
R.Abbasov onu da qeyd edib ki, Çində Sevgililər Günü ilə yanaşı, hətta tələbə bayramı - “Subaylar günü” mövcuddur. Subay çinlilər bu gündə özlərinə ləzzətli yeməklər hazırlayırlar. Hazırda Çində “Subaylar günü”nün qeyd edilməsi birhəftəlik alış-veriş festivalına çevrilib.
Bölmənin digər xəbərləri
