Ağdam, 29 yanvar, Tahir Ağaməmmədov, AZƏRTAC

Bələdiyyə seçkiləri Qarabağ bölgəsinin Ağcabədi, Ağdam, Bərdə və Tərtər rayonlarını əhatə edən seçki dairələrində seçicilərin ruh yüksəkliyi ilə başlayıb.

Dairə Seçki komissiyalarından AZƏRTAC-ın bölgə müxbirinə verilən məlumata görə, səsvermə hüququ olan sakinlər səhər saat 8-dən seçki məntəqələrinə gələrək azad, sərbəst şəkildə səs verir, öz vətəndaşlıq borclarını yerinə yetirirlər.

Bölgə üzrə səsvermə 85 saylı Füzuli-Ağcabədi, 86 saylı Ağcabədi, 97 saylı Tərtər-Ağdərə-Goranboy, 98 saylı Bərdə-Tərtər, 99 saylı Bərdə və 119 saylı Ağdam seçki dairələri üzrə 290 seçki məntəqəsində keçirilir. Məntəqələrin 40-da veb-kameralar quraşdırılıb. Bu seçki dairələri üzrə adları seçici siyahılarına daxil edilən seçicilərin ümumi sayı 263 min 658 nəfərdir. Region üzrə 54 bələdiyyəyə 589 nəfər bələdiyyə üzvü seçiləcəkdir. Seçkidə 1192 nəfər namizəd mübarizə aparır. Seçkiləri izləmək üçün 3542 müşahidəçi qeydiyyatdan keçib.

AZƏRTAC-ın bölgə müxbiri Ağdam rayonunun Qaradağlı kənd tam orta məktəbinin binasındakı 27 saylı seçki məntəqəsində səsvermə prosesini müşahidə edib. Səhər saatlarından məntəqəyə üz tutan seçicilər konstitusion hüquqlarından istifadə edirlər. Seçki məntəqəsində ilk səs verən kənd sakini Məhəmmədəli Səfərov yaradılan şəraitdən razılığını bildirərək deyib: “Bütün seçkilərdə iştirak edirəm. Bu gün də bir Azərbaycan vətəndaşı kimi öz seçki hüququmdan istifadə edərək istədiyim namizədə səs verdim. Məntəqədə yaradılan şəraitdən razıyam. Ölkəmiz üçün uğurlu olsun”.

Qeyd edək ki, ölkə üzrə 08:00-da başlayan səsvermə prosesi saat 19:00-da başa çatacaq. Səsvermə 118 seçki dairəsinin 5846 seçki məntəqəsində keçirilir. 16 min 92 namizədin mübarizə apardığı səsvermədə 685 bələdiyyəyə 8 min 71 üzv seçiləcək. Səsvermə hüququ olan seçicilərin sayı 5 milyon 961 min 987 nəfərdir. Seçkiləri izləmək üçün 70 min 625 yerli müşahidəçi qeydiyyatdan keçib.

Səsvermənin şəffaflığını təmin etmək üçün 1000 seçki məntəqəsində veb-kameralar quraşdırılıb. Veb-kameralar quraşdırılmış seçki məntəqələrinin siyahısı media subyektlərində dərc olunub və MSK-nın internet səhifəsində yerləşdirilib.

Azərbaycanda mövcud olan 125 dairədən 7-si işğaldan azad edilmiş ərazilərdə yerləşdiyi üçün bu proseslərdə iştirak etmir. Ümumilikdə həmin dairələrdən başqa digər 4 dairədə də keçmiş məcburi köçkün vətəndaşlar var.