Azərbaycan Prezidenti İlham Əliyev yanvarın 17-də Ağdam rayonunun Quzanlı qəsəbəsində Olimpiya İdman Kompleksinin təntənəli açılış mərasimində iştirak etmişdir. Mərasimə toplaşan idmançılar, inşaatçılar və yerli sakinlər dövlət başçısını və xanımını böyük hörmət və ehtiramla, gül-çiçəklə qarşıladılar.

Prezident İlham Əliyev idmançılar və inşaatçılarla görüşdü, sonra Olimpiya İdman Kompleksinin rəmzi açılışını bildirən qırmızı lenti kəsdi.

Kompleksin tikintisinə 2006-cı ilin yazında başlanmış, dövlətimizin başçısı təməlqoyma mərasimində iştirak etmişdi. Dövlət Neft Fondunun vəsaiti hesabına tikilmiş və üç hektar ərazisi olan kompleksin ikimərtəbəli binasında 500 yerlik tribunaları olan idman salonu, habelə kiçik idman salonu, trenajor, məşq salonları, beynəlxalq standartlara uyğun, 2 min yerlik tribunaları olan futbol meydançası, voleybol və basketbol meydançaları, 30 nəfərlik mehmanxanası vardır. Tikinti işlərində hər ay 100 nəfər çalışmışdır.

Prezident İlham Əliyev komplekslə tanış oldu, burada yaradılan şəraitlə maraqlandı.

Olimpiya kompleksinin açılışına həsr olunmuş mərasim Azərbaycanın Dövlət himninin səsləndirilməsi ilə başlandı.

X X X

Mərasimi açan Ağdam Rayon İcra Hakimiyyətinin başçısı HƏSƏN SARIYEV rayonun işğal altında olmayan ərazilərində aparılan yenidənqurma və sosial-iqtisadi inkişaf barədə məlumat verdi:

- Möhtərəm cənab Prezident, ikinci dəfədir ki, dövlət başçısı kimi Siz ağdamlıların görüşünə gəlirsiniz. İcazə verin, Sizə Ağdamın bütün sakinlərinin salamlarını çatdırım.

Sizin bilavasitə rəhbərliyiniz və tapşırığınız əsasında ardıcıl olaraq həyata keçirilən və məcburi köçkünlərin sosial problemlərinin, mənzil-məişət şəraitinin yaxşılaşdırılmasına yönələn tədbirləri hər bir ağdamlı öz üzərində hiss edir və buna görə Sizə minnətdardır. 2006-cı ildə rayonumuzda olarkən dediyiniz “Ağdam rayonunun inkişafı xüsusi diqqət tələb edir” sözləri ağdamlılara olan diqqətinizin bariz nümunəsi idi.

Məlumat verirəm ki, ötən müddət ərzində rayonda 3800 ailə üçün 12 qəsəbə salınmış, 2234 yerlik 16 məktəb binası, 9 səhiyyə obyekti, mərkəzi poçt binası və 6 poçt şöbəsi, 5 uşaq bağçası inşa edilmiş, 20-dən çox sosial obyekt tikilib istifadəyə verilmişdir. Bundan başqa, 16 kilometr uzunluğunda asfalt yol salınmış, 26 kilometr yol təmir edilmiş, səkilərə 8 min kvadratmetr üzlük plitə döşənmişdir.

İqtisadiyyatın bütün sahələrində nailiyyətlər əldə edilmişdir. 2003-cü illə müqayisədə 2007-ci ildə ümumi məhsul istehsalının həcmi 4,3 dəfə, o cümlədən kənd təsərrüfatı məhsulları istehsalı 3,2 dəfə, tikinti işlərinin həcmi 29 dəfə artmışdır. 4527 yeni iş yeri açılmışdır ki, bunun da 1609-u daimi iş yeridir. Bu da Sizin ağdamlılara olan qayğınızın təzahürüdür.

Möhtərəm cənab Prezident,

Sizin rəhbərliyiniz altında Ağdamın inkişafı üçün bu gün də ardıcıl tədbirlər həyata keçirilir. Quzanlı kəndinə qəsəbə statusunun verilməsi, onun abadlaşdırılmasına Sizin tapırığınızla 500 min manat vəsaitin ayrılması, müasir Olimpiya İdman Kompleksinin tikintisi bunun bariz nümunəsidir. Buna görə ağdamlılar Sizə minnətdardır.

Həsən Sarıyev dövlətimizin başçısının xüsusi qayğısı nəticəsində Quzanlı qəsəbəsinin daha da inkişaf edəcəyini və Qarabağın dilbər guşələrindən birinə çevriləcəyini vurğuladı. O, daha sonra dedi:

-Möhtərəm cənab Prezident, qaçqınların və məcburi köçkünlərin yaşayış şəraitinin yaxşılaşdırılması və məşğulluğun artırılması üzrə Dövlət proqramına əlavələr edilməsi haqqında 2007-ci il 31 oktyabr tarixli Sərəncamınıza uyğun olaraq, Ağdamda 1583 nəfərlik yeni qəsəbənin salınması, 75 çarpayılıq mərkəzi xəstəxananın, 50 çarpayılıq uşaq xəstəxanasının, 3 yeni orta məktəb binasının tikintisi, 2 məktəbin əsaslı təmir olunması, 80 subartezian quyusunun qazılması, qəsəbəyə və ətraf kəndlərə qaz xəttinin çəkilməsi, kəndarası yolların əsaslı təmir edilməsi və s. tədbirlərin nəzərdə tutulması bütün ağdamlıların sevincinə səbəb olmuşdur. Bu yüksək qayğıya görə bir daha Sizə rayonumuzun bütün sakinlərinin təşəkkürünü və minnətdarlığını çatdırıram.

Möhtərəm cənab Prezident!

Bu gün Ağdam rayonu öz normal həyat tərzini yaşayır. Yüksək diqqətinizə çatdırmaq istəyirəm ki, ağdamlılar Sizin qayğınız nəticəsində öz doğma yurdlarına qayıdır, atəşkəs rejiminin tez-tez pozulmasına baxmayaraq, düşmənlə üzbəüz dayanaraq, heç bir qorxu hiss etmədən yaşayır, qurub-yaradırlar. Əgər 10 il əvvəl Ağdam rayonunun işğal olunmamış ərazilərində 15 min əhali yaşayırdısa, bu gün onların sayı 90 min nəfərə yaxındır. Bütün bunlar Sizin Ağdam rayonunun inkişafına göstərdiyiniz yüksək diqqətin nəticəsidir. Təsadüfi deyil ki, ağdamlılar bu inkişafı daha çox hiss edirlər. Təkcə son iki ildə 40 minə yaxın adam öz doğma yurduna qayıtmışdır. Sizin tapşırığınızla əhalinin elektrik enerjisi ilə təchizatını yaxşılaşdırmaq üçün qəsəbədə 16 meqavat gücündə iki yardımçı stansiya quraşdırılmış və bununla da ağdamlıların elektrik enerjisi problemi tamamilə həll edilmişdir.

Bu gün sakinlərimiz davamlı olaraq 24 saat elektrik enejisi ilə təmin olunur və buna görə də Sizə minnətdardırlar. Eyni zamanda, Sizin tapşırığınızla Quzanlıya və ətraf kəndlərə təbii qazın verilməsi üçün hazırda layihələndirmə işləri gedir. Bu işlərin cari ildə başa çatdırılması nəzərdə tutulubdur. Təbii ki, Ağdam rayonunun inkişafında baş verən müsbət dəyişiklikləri mənfur qonşularımız da görür və bunun nə demək olduğunu aydın hiss edirlər. Bütün bunlar onu göstərir ki, ulu öndərimizin siyasi xətti bu gün də həyata keçirilir. Vətəndaşlarımız aparılan məqsədyönlü siyasətə inanır və dərk edirlər ki, dövlətimiz xalqımızın inandığı və arxalandığı rəhbərliyi tərəfindən məharətlə idarə olunur.

Möhtərəm cənab Prezident,

Ulu öndərimizin zəngin irsinin öyrənilməsi və təbliği, onun Azərbaycanın tərəqqisinə yönəlmiş genişmiqyaslı fəaliyyətinin gələcək nəsillərə çatdırılması istiqamətində YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın xidmətləri danılmazdır. Eyni zamanda, onun Azərbaycan mədəniyyətinin, təhsilinin, səhiyyəsinin inkişafına, dünya azərbaycanlılarının birliyinə yönələn fəaliyyəti ağdamlılar tərəfindən də böyük rəğbətlə qarşılanır.

İcra hakimiyyətinin başçısı Prezident İlham Əliyevin daxili və xarici siyasətini ürəkdən bəyəndiklərini xatırladaraq, qarşıdakı prezident seçkilərində ona səs verəcəklərinə əminliyini söylədi:

-Möhtərəm cənab Prezident,

2008-ci ilin şaxtalı qış günlərində Sizin ilk səfərinizdə Ağdama gəlməyiniz ağdamlıların ürəklərini isindirir. Bizim bu günümüz də, sabahımız da Sizinlə bağlıdır. Bütün Azərbaycan xalqı kimi, ağdamlılar da Sizi dərin məhəbbətlə sevirlər. Bu seçki ilində biz bəyan edirik ki, bütün ağdamlılar bu yüksəlişi, bu inkişafı, bu firavanlığı bizə bəxş edən Sizi ürəkdən dəstəkləyir və özlərinin daimi əbədi Prezidenti hesab edirlər.

Cənab Prezident, bütün ağdamlıların istəyi, ürək sözləri odur ki, Siz bizim əbədi Prezidentimiz, iftixarımızsınız və bununla hamımız fəxr edirik.

Yunan-roma güləşi üzrə Azərbaycan yığma komandasının baş məşqçisi ELÇİN CƏFƏROV 2007-ci ildə Azərbaycanda 36 mötəbər beynəlxalq yarışın keçirildiyini, idmançılarımızın dünya, Avropa çempionatlarında, müxtəlif beynəlxalq yarışlarda uğurla çıxış etdiklərini vurğuladı:

- Cənab Prezident, idmançılarımız 452 medal qazanmış, dünyanın müxtəlif ölkələrində dövlətimizin bayrağını ucaltmış, himnini səsləndirmişlər. Bütün bu nailiyyətlərin qazanılması Sizin rəhbərliyinizlə idmanın maddi-texniki bazasının əsaslı şəkildə yenidən qurulmasının, idmançılarımıza və məşqçilərə, onların sosial-məişət problemlərinin həllinə, bütün idman ictimaiyyətinə olan diqqət və qayğınızın nəticəsidir.

Cənab Prezident, bir məşqçi və vətəndaş kimi bu gün mən fəxr edirəm ki, Sizin təşəbbüsünüzlə Bakı 2016-cı il Yay Olimpiya oyunlarının keçirilməsinə namizəd şəhər kimi qeydə alınmışdır. Bu, həm də ulu öndərimiz Heydər Əliyev tərəfindən təməli qoyulan və hazırda möhtərəm Prezidentimiz İlham Əliyevin rəhbərliyi ilə davam etdirilən uğurlu iqtisadi siyasətin parlaq təzahürüdür.

Möhtərəm cənab Prezident, mənim üçün bu gün ikiqat bayramdır. Birincisi, yığma komandanın baş məşqçisi kimi bu idman kompleksinin tikilib idmançıların istifadəsinə verilməsi mərasimində iştirak edirəm. İkincisi də, bu hadisə mənim doğma elimdə - Ağdam rayonunda baş veribdir. Çox fəxr edirəm ki, öz şəraitinə görə bu olimpiya kompleksi bizim dünya və Avropa çempionatları zamanı çıxış etdiyimiz idman komplekslərindən heç də geri qalmır. Ümumiyyətlə, Sizin rəhbərliyinizlə ölkədəki iqtisadi sıçrayış, siyasi sabitlik və sosial siyasət idmanın inkişafı üçün də hərtərəfli şərait yaratmışdır. Biz idmançılar, ağdamlılar, qarabağlılar öz seçimimizi etmişik. İlham Əliyev bizim əbədi Prezidentimizdir. Bu fürsətdən istifadə edərək, idmançılar ordusu adından Sizə dərin minnətdarlığımı bildirirəm. Biz idmançılar həmişə Sizinləyik.

Cənab Prezident, bildiyiniz kimi, qarşıda bizi daha çətin bir sınaq - Pekində keçiriləcək XXIX Yay Olimpiya oyunları gözləyir. İdmançılar adından söz verirəm ki, ölkəmizi layiqincə təmsil etmək üçün bütün gücümüzü səfərbər edəcəyik.

Diqqətinizə görə təşəkkür edirəm.

X X X

Azərbaycan Prezidenti İlham Əliyev mərasimdə nitq söylədi.

X X X

Sonra incəsənət ustalarının iştirakı ilə konsert və idmançıların nümunəvi çıxışları oldu.

Xalq artisti Mənsum İbrahimov dövlətimizin başçısına müraciətlə dedi ki, möhtərəm cənab Prezident, mən də bu torpağın bir nümayəndəsi kimi ümidvaram, ifa etdiyim “Qarabağ şikəstəsi” Sizin iştirakınızla Ağdam şəhərində tezliklə qələbə bayramında səslənəcəkdir.