Ağdaşda cari ilin planına uyğun olaraq mədəni meşələrin salınmasına başlanmışdır
Ağdaş, 16 fevral (AZƏRTAC). Ağdaş rayonunda meşələrin mühafizəsi, yeni meşələrin salınması və qiymətli ağac tinglərinin yetişdirilməsi diqqət mərkəzindədir. Ağdaş rayon Meşələrin Mühafizəsi və Bərpası Müəssisəsindən AZƏRTAC-a bildirmişlər ki, havanın əlverişli keçməsi rayonda bu ilin planı üzrə yeni mədəni meşələrin salınması işlərinə başlanmışdır. Bu günədək 40 hektar sahə əkinə hazırlanmşdır. Hazırda həmin ərazidə ağac əkini aparılır. Cari ildə rayonda 100 hektar sahədə mədəni meşələrin salınması nəzərdə tutulur.
İdarənin tabeliyində olan Ağdaş və Ağzıbir meşəbəyliklərinin ərazisində 2012-ci ildə 91 hektar sahədə mədəni meşə salınmışdır. Əsasən şam, qovaq, akasiya və iydə ağaclarından ibarət on minlərlə ağac hesabına Kür çayının kənarındakı Tuqay meşələri daha da genişləndirilmişdir. Ağdaş, Göyçay və Ucar rayonlarında yerləşən 7.500 hektar meşə sahəsini əhatə edən Ağdaş rayon Meşələrin Mühafizəsi və Bərpası Müəssisəsinin nəzdində böyük tingçilik təsərrüfatı da fəaliyyət göstərir. Orada yetişdirilən 700 min ədəd ağac tingindən meşəliklərin salınmasında, eləcə də, həmin rayonlarda təşkil edilən ağacəkmə aksiyalarında geniş istifadə olunur.
Bölmənin digər xəbərləri
