Ağdaşda ulu öndər Heydər Əliyevin xatirəsinə ehtiram əlaməti olaraq yaşıllaşdırma kampaniyasına start verilmişdir
Ağdaş, 15 fevral (AZƏRTAC). Prezident İlham Əliyevin “Azərbaycan xalqının ümummilli lideri Heydər Əliyevin 90 illik yubileyi haqqında” 2013-cü il 21 yanvar tarixli Sərəncamını rəğbətlə qarşılayan Ağdaş rayon ictimaiyyətinin nümayəndələri yaşıllaşdırma aksiyasına start vermişlər.
Rayon icra hakimiyyətindən AZƏRTAC-a bildirmişlər ki, ulu öndər Heydər Əliyevin xatirəsinə ehtiram əlaməti olaraq 2013-cü ildə rayon ərazisində 90 min ədəd müxtəlif cinsdən olan ağacın əkilməsi təşəbbüsü irəli sürülmüşdür. Ağac əkiləcək ərazilər plan üzrə idarə və təşkilatlar arasında bölünmüşdür. Ağdaş şəhərində və kəndlərdə tez-tez keçirilən iməciliklərdə idarə, müəssisə və təşkilatlardan, mədəniyyət, təhsil və səhiyyə ocaqlarından minlərlə adam iştirak edir. Sadə insanlar da yaşıllığın salınmasında xüsusi fəallıq nümayiş etdirirlər.
Bu günədək Ağdaş şəhərində küçə kənarlarına, park və bağlara, sosial obyektlərin ətrafına, kəndlərdə yolların kənarına, ümumilikdə 20 min müxtəlif növ ağac və gül kolu əkilmişdir. İməciliklər zamanı rayon ərazisindən keçən Bakı-Şamaxı-Yevlax və Bakı-Qazax magistral avtomobil yollarının kənarlarında təmizlik-abadlıq işləri görülür, yaşıllıq zolağı salınır. İlin sonunadək rayonda daha 70 min ağacın əkilməsi nəzərdə tutulur.
Bölmənin digər xəbərləri
