Agentlik: Bu il 6763 nəfərdən çox əlil işlə təmin olunub
Bakı, 5 dekabr, AZƏRTAC
Cari ildə 6763 nəfərdən çox əlil Dövlət Məşğulluq Agentliyinin göndərişi əsasında işlə təmin olunub.
AZƏRTAC xəbər verir ki, bunu Dövlət Məşğulluq Agentliyinin departament direktoru Pərviz Bənnalı “Əlilliyi olan sahibkarların idarəetmə bacarıqlarının artırılması” forumunda bildirib.
O qeyd edib ki, 346 əlil şəxs peşə hazırlıqlarına cəlb olunub.
Dövlət Məşğulluq Agentliyinin departament direktoru əlavə edib ki, işsiz və işaxtaran şəxslərin əmək müqaviləsi əsasında ödənişli ictimai işlərlə təminatında mühüm rola malik olan “İşsizin DOSTu” proqramı çərçivəsində bu il 5157 şəxs işlə təmin edilib və proqrama cəlb edilmək üçün müraciət edənlər arasında üstünlük verilən həssas qruplardan biri də əlilliyi olan şəxslərdir.
"Özünüməşğulluq proqramına cəlb edilmək üçün müraciət edənlər arasında üstünlük verilən sosial cəhətdən həssas kateqoriyalardan biri də əlilliyi olan şəxslərdir. Bu il müraciət edən əlilliyi olan şəxslərdən özünüməşğulluq fəaliyyətini və kiçik biznesini qurmaq üçün potensialları olan 1115 nəfərdən çox əlilliyi olan şəxs özünüməşğulluq proqramına cəlb olunub", - deyə agentlik rəsmisi qeyd edib.
Bölmənin digər xəbərləri
