AĞSUDA XOCALI FACİƏSİNİN 17-Cİ İLDÖNÜMÜNƏ HƏSR OLUNMUŞ “DƏYİRMİ MASA” KEÇİRİLMİŞDİR
Ağsu, 24 fevral (AZƏRTAC). Rayon mərkəzləşdirilmiş kitabxana sistemində ötən əsrin ən qanlı hadisələrindən olan Xocalı soyqırımının 17-ci ildönümünə həsr olunmuş “dəyirmi masa” keçirilmişdir.
Rayon icra hakimiyyəti ilə mərkəzləşdirilmiş kitabxana sisteminin birgə təşkil etdikləri tədbirin əvvəlində faciə qurbanlarının xatirəsi bir dəqiqəlik sükutla yad edilmişdir.
“Dəyirmi masada” çıxış edənlər ermənilərin zaman-zaman xalqımıza qarşı törətdikləri kütləvi qırğınlar, torpaqlarımızın işğalı ilə bağlı məkrli niyyətləri konkret, tarixi faktlarla diqqətə çatdırılmışdır. Qeyd olunmuşdur ki, 1992-ci il fevralın 25-dən 26-na keçən gecə keçmiş sovet imperiyasının 366-cı motoatıcı alayının köməyi ilə Xocalıda törədilən qanlı faciə erməni vandalizminin mahiyyətini bir daha bütün dünyaya göstərmişdir. Bir gecədə Xocalı şəhəri yerlə-yeksan edilmiş, 613 nəfər günahsız insan - qoca, uşaq və qadın qətlə yetirilmiş, 487 nəfər əlil olmuş, 1275 nəfər əsir götürülmüşdür.
Çıxış edənlər o illərdə Ağsu rayonundan cəbhə xəttində onlarla könüllünün döyüşdüyünü, bölgəyə ardıcıl olaraq ərzaq və digər yardımların göndərildiyini, Xocalı soyqırımına Azərbaycanın hər yerində olduğu kimi, burada da dərhal kəskin etiraz bildirildiyini qeyd etmişlər.
“Dəyirmi masa”da o dəhşətli gecədə qohum-əqrəbasını, oğlunu itirən Xocalı sakini Elmira Bağırova çıxış edərək baş verən faciənin təfərrüatlarından danışmışdır.
Bölmənin digər xəbərləri
