AİB rəsmisi: Dövlət-özəl tərəfdaşlığı Azərbaycanda şəhər infrastrukturunun inkişafında mühüm rol oynaya bilər
Bakı, 20 may, AZƏRTAC
Dövlət-özəl tərəfdaşlığı Azərbaycanda şəhər infrastrukturunun inkişafında və müasir şəhər məkanlarının formalaşdırılmasında mühüm rol oynaya bilər.
Bu barədə AZƏRTAC-a ekskluziv müsahibəsində Ümumdünya Şəhərsalma Forumunun 13-cü Sessiyasında (WUF13) iştirak edən Asiya İnkişaf Bankının (AİB) Su Təsərrüfatı və Şəhər İnkişafı Departamentinin direktoru Şrinivas Sampat bildirib.
Onun sözlərinə görə, dövlət-özəl tərəfdaşlığı mexanizmləri xidmətlərin keyfiyyətinin və əməliyyatların səmərəliliyinin artırılmasına, infrastruktur layihələrinin daha sürətli icrasına, innovasiya və texnologiyaların tətbiqinə, həmçinin uzunmüddətli özəl kapitalın cəlb olunmasına töhfə verə bilər. O qeyd edib ki, effektiv idarəetmə, eləcə də aydın planlaşdırma və nəzarət mexanizmləri mövcud olduqda, dövlət-özəl tərəfdaşlıq torpaqdan istifadə və infrastrukturun inkişafı proseslərinə inteqrasiya edilə bilər.
Şrinivas Sampat vurğulayıb ki, dövlət-özəl tərəfdaşlığın ən böyük potensialı bir sıra əsas istiqamətlərdə özünü göstərir. Bunlara nəqliyyat qovşaqları ətrafında ərazilərin inkişafı və əlçatan mənzillə çoxfunksiyalı tikililərin yaradılması, şəhər ərazilərinin yenilənməsi və sənaye zonalarının yenidən qurulması, “yaşıl” və dayanıqlı infrastrukturun inkişafı, rəqəmsal texnologiyaların və vətəndaşyönümlü xidmətlərin tətbiqi, turizmin inkişafı, eləcə də bələdiyyə maliyyələşdirilməsinin təkmilləşdirilməsi daxildir.
Bölmənin digər xəbərləri
